AQSh Moliya vazirligining Xorijiy aktivlar ustidan nazorat boshqarmasi (Office of Foreign Assets Control, OFAC) ikki nafar tayvanlik fuqaro, Tayvan va Gonkongda faoliyat olib boruvchi uchta yuridik shaxs hamda bir kema Shimoliy Koreyaga nisbatan sanksiyalarni buzgani uchun qora ro‘yxatga kiritilganini ma’lum qildi. Bu haqda “Kommersant” xabar bermoqda.
“Moliya vazirligi noqonuniy tashishga aloqador alohida shaxslar, tashkilotlar va kemalarning amaldagi AQSh va BMT sanksiyalariga rioya etishini nazorat qiladi va ta’minlaydi”, — deb ta’kidlangan vazirlik bayonotida.
Sanksiyalar fuqarolar Xuang Van Ken va Chen Mey Syan, shuningdek, Jui Pang Shipping Co Ltd, Jui Zong Ship Management Co Ltd, Jui Cheng Shipping Company Limited kompaniyalari va Shang Yuan Bao kemasiga tatbiq etilgan.
Avvalroq Shimoliy Koreya yana raketa parvozlarini amalga oshirgan edi. Rasmiy Seul va Vashington KXDRning bu harakatini BMT Xavfsizlik kengashi rezolyutsiyalarining buzilishi deb baholagan edi. Pxenyan esa bu AQSh va Janubiy Koreyaning davom etayotgan birgalikdagi harbiy mashg‘ulotlariga javob munosabati ekanini ta’kidlamoqda.
Izoh (0)