Avvalroq, Rossiyaning Istiqbolli texnologiyalarni rivojlantirish markazi (ITRM) O‘zbekistondagi mahsulotlarni markirovka qilishga jalb etilayotgani haqida xabar berilgan edi. Hozirda ushbu kompaniya bilan memorandum imzolangan bo‘lib, CRPT TURON sho‘ba korxonasi esa operatorga aylanmoqchi, deb xabar beradi Spot.
2017-yilda asos solingan ITRMning 50 foiz ulushi Alisher Usmonovning USM Xoldings kompaniyasiga, 25 foizi “Rostex” davlat korporatsiyasiga, qolgan 25 foizi Almaz Capital boshqaruv sherigi Aleksandr Galiskiyga tegishli.
Nega aynan shu komaniya?
Davlat soliq qo‘mitasining loyihasiga ko‘ra, O‘zbekiston markirovka masalasida Rossiya tajribasiga tayanadi. Rossiyada esa ITRM mahsulotlarni markirovka qilish bo‘yicha davlat tizimining rasmiy operatori maqomiga ega.
2019-yilning may oyida O‘zbekiston hukumati Rossiya tajribasini o‘rganish uchun u yerga delegatsiya yuborgan, 13-iyun kuni esa markirovka tizimini yaratish bo‘yicha tadbirlar rejasini tasdiqlagan edi.
2019-yilning sentabridan tamaki mahsulotlarini markirovka qilish, oktabr oyidan esa alkogol va plastik idishlardagi, shuningdek, shisha va kegadagi pivolarga nisbatan qo‘llaniladi. Alkogol mahsulotlari markirovkasining birinchi bosqichida beshta yirik korxona ishtirok etadi, hozircha ularning nomi ma’lum emas.
ITRM bosh direktorining o‘rinbosari Revaz Yusupovning aytishicha, kompaniya Rossiyada markirovkani joriy etish bo‘yicha yetarlicha tajriba to‘plab ulgurgan, Qozog‘iston va Belarus markirovka operatorlari bilan hamkorlikda ishlab kelmoqda va “O‘zbekistonda loyihani amalga oshirish va o‘z tajribasi bilan bo‘lishishga tayyor”.
Rossiyadagi singari O‘zbekistonda ham dastlab loyiha bepul amalga oshiradi.
Markirovga nega kerak va nima uchun tamaki, alkogol va pivodan boshlashmoqda?
O‘zbekiston Bosh prokuraturasi huzuridagi Axborot-tahlil multimedia markazi soxta mahsulotlardan foydalanishning iste’molchilar va davlat uchun xavfi hamda markirovka joriy etishning afzalliklari haqida ma’lumot bergandi.
Keltirilgan ma’lumotlarga ko‘ra, soxta tamaki mahsulotlarida 6 barobar ko‘proq qo‘rg‘oshin bo‘lsa, toshko‘mir 160 foizni, uglerod oksidi 133 foizni tashkil etadi.
2017-yili O‘zbekistonda 125,4 milliard so‘mlik tovarlarni noqonuniy olib kirishga urinilgan 764 ta holat aniqlangan bo‘lsa, 2018-yilning yetti oyida esa 80,4 milliard so‘mlik 407 ta fakt aniqlangan.
Revaz Yusupovning so‘zlariga ko‘ra, O‘zbekiston rahbariyati noqonuniy mahsulotlarga qarshi kurashishga qiziqib qolgan.
Izoh (0)