Ўзбекистон учун маркировка нега керак ва нима учун бу билан Алишер Усмонов компанияси шуғулланмоқда?

Аввалроқ, Россиянинг Истиқболли технологияларни ривожлантириш маркази (ITRM) Ўзбекистондаги маҳсулотларни маркировка қилишга жалб этилаётгани ҳақида хабар берилган эди. Ҳозирда ушбу компания билан меморандум имзоланган бўлиб, CRPT TURON шўба корхонаси эса операторга айланмоқчи, деб хабар беради Spot.

2017 йилда асос солинган ITRMнинг 50 фоиз улуши Алишер Усмоновнинг USM Xoldings компаниясига, 25 фоизи «Ростех» давлат корпорациясига, қолган 25 фоизи Almaz Capital бошқарув шериги Александр Галискийга тегишли.

Нега айнан шу комания?

Давлат солиқ қўмитасининг лойиҳасига кўра, Ўзбекистон маркировка масаласида Россия тажрибасига таянади. Россияда эса ITRM маҳсулотларни маркировка қилиш бўйича давлат тизимининг расмий оператори мақомига эга.

2019 йилнинг май ойида Ўзбекистон ҳукумати Россия тажрибасини ўрганиш учун у ерга делегация юборган, 13 июнь куни эса маркировка тизимини яратиш бўйича тадбирлар режасини тасдиқлаган эди.

2019 йилнинг сентябридан тамаки маҳсулотларини маркировка қилиш, октябрь ойидан эса алкогол ва пластик идишлардаги, шунингдек, шиша ва кегадаги пиволарга нисбатан қўлланилади. Алкогол маҳсулотлари маркировкасининг биринчи босқичида бешта йирик корхона иштирок этади, ҳозирча уларнинг номи маълум эмас.

ITRM бош директорининг ўринбосари Реваз Юсуповнинг айтишича, компания Россияда маркировкани жорий этиш бўйича етарлича тажриба тўплаб улгурган, Қозоғистон ва Беларусь маркировка операторлари билан ҳамкорликда ишлаб келмоқда ва «Ўзбекистонда лойиҳани амалга ошириш ва ўз тажрибаси билан бўлишишга тайёр».

Россиядаги сингари Ўзбекистонда ҳам дастлаб лойиҳа бепул амалга оширади.

Маркировга нега керак ва нима учун тамаки, алкогол ва пиводан бошлашмоқда?

Ўзбекистон Бош прокуратураси ҳузуридаги Ахборот-таҳлил мултимедиа маркази сохта маҳсулотлардан фойдаланишнинг истеъмолчилар ва давлат учун хавфи ҳамда маркировка жорий этишнинг афзалликлари ҳақида маълумот берганди.

Келтирилган маълумотларга кўра, сохта тамаки маҳсулотларида 6 баробар кўпроқ қўрғошин бўлса, тошкўмир 160 фоизни, углерод оксиди 133 фоизни ташкил этади.

2017 йили Ўзбекистонда 125,4 миллиард сўмлик товарларни ноқонуний олиб киришга уринилган 764 та ҳолат аниқланган бўлса, 2018 йилнинг етти ойида эса 80,4 миллиард сўмлик 407 та факт аниқланган.

Реваз Юсуповнинг сўзларига кўра, Ўзбекистон раҳбарияти ноқонуний маҳсулотларга қарши курашишга қизиқиб қолган.