Sibirda jismoniy shaxslar tomonidan mamlakatga olib kirilayotgan avtomobillar uchun beriladigan transport vositalarining pasportlari soni (TVP) keskin oshib ketgani ma’lum bo‘ldi, deb xabar beradi “KNews.kg”.
2019-yilning yanvaridan iyul oyiga qadar 1244 TVP berilgan, bu esa 2018-yilning xuddi shu davriga nisbatan 3 barobarga ko‘p demakdir. Novosibirsk (613 TVP) va Oltoy (327 TVP) bojxonalarida o‘sish esa 4 barobardan ortiqroq. Kemerova (95), Krasnoyarsk (43) va Irkutsk (16) bojxonalarida esa ko‘rsatkichlar biroz past.
Avtomobillarning asosiy qismi Qirg‘izistondan (336) olib kirilgan bo‘lsa, ikkinchi o‘rinda Qozog‘iston (336) turibdi. Armaniston esa 64 ko‘rsatkich bilan uchinchi o‘rinda. Bu kabi o‘sishga Qirg‘iziston bojxonalarida to‘lov stavkalarining Rossiyanikiga nisbatan pastligi sabab bo‘lgan.
Yuridik shaxslar tomonidan olib kirilgan transport vositalari sonida ham o‘sish kuzatilgan. O‘tgan yilgiga nisbatan o‘sish 69 foizga teng.
Rossiya bojxona qo‘mitasining ma’lum qilishicha, Rossiya hududida Qirg‘izistonda ro‘yxatdan o‘tgan va 2014-yilning 1-yanvaridan keyin import qilingan transport vositalaridan faqatgina respublika fuqarolari foydalana oladi. Ularni sotish yoki boshqa bir shaxsga foydalanish uchun berish bojxona deklaratsiyalari orqali amalga oshiriladi.
Izoh (0)