Indoneziya poytaxti Jakartadan Kalimantan orolining janubi-sharqiy qismiga ko‘chiriladi. Bu haqda 26-avgust kuni mamlakat prezidenti Joko Vidodo jonli efirda ma’lum qildi, deya xabar beradi Spot.
Poytaxtni ko‘chirish uchun qariyb 32 milliard dollar sarflanishi kutilmoqda, asosiy ishlar 2021-yilda boshlanadi. Rejalashtirish va milliy rivojlanish vaziri Bambang Brojonegoroning ta’kidlashicha, rasmiylar 2024-yilga kelib hukumat yangi poytaxtga ko‘chib o‘tishini kutmoqda.
Kalimantan seysmologik jihatdan xavfsiz hududda joylashgan bo‘lib, bu dunyodagi eng katta Indoneziya arxipelagi hisoblanadi. Mazkur hudud 18 ming oroldan tashkil topgan.
Hozirgi poytaxtda shahar infratuzilmasining yetarli darajada rivojlanmaganligi bilan bog‘liq jiddiy muammolar mavjud.
Uber kompaniyasi tadqiqotlariga ko‘ra, haydovchilar yiliga 22 kunni Jakartadagi tirbandlikda o‘tkazadi, bu esa Osiyodagi eng baland ko‘rsatkichdir. Bundan tashqari, Inrix hisobotiga ko‘ra, shahar dunyoning eng band shaharlari reytingida 12-o‘rinni egallaydi.
Bloomberg Jakarta shahrining beshdan ikki qismi dengiz sathidan past bo‘lgani sababli tom ma’noda cho‘kayotganini qo‘shimcha qildi. Ko‘p sonli tirbandliklar sababli, mehnat unumdorligini yo‘qotish yiliga taxminan 7 milliard dollarni tashkil qiladi.
Vidodoning fikricha, poytaxtni boshqa joyga ko‘chirish arxipelagdagi daromadlar tengsizligini bartaraf etishga yordam beradi. Java aholisi Indoneziya aholisining qariyb 60 foizini tashkil qiladi va uning yalpi ichki mahsulotining 58 foizini ta’minlaydi.
Aholining atigi 5,8 foizi Kalimantanda istiqomat qiladi va YaIMning 8,2 foizini tashkil qiladi. Orolda zamonaviy aeroportlar va yaxshi yo‘llar, shuningdek, ichimlik suvi mavjud. Rasmiylar asrlar davomida poytaxt bo‘lib xizmat qilishi mumkin bo‘lgan zamonaviy, aqlli va yashil shahar qurishni rejalashtirmoqda.
Jakartaga kelsak, shahar yashash va rivojlanishda davom etmoqda. 2030-yilga kelib uning aholisi 35,6 million nafarga yetishi kutilmoqda. Bu esa dunyoning eng ko‘p aholisi bo‘lgan shaharga aylanishiga yordam beradi. Shahar mamlakatning asosiy tijorat markazi bo‘ladi. Jakartaning suv ostida qolishining oldini olish uchun rasmiylar katta to‘lqinlardan himoya qiladigan ulkan devor qurishni rejalashtirmoqda.
Izoh (0)