O‘zbekistonlik yigit Permdagi YTHga uchragan avtobus ichidagi jabrlanuvchilarni qutqardi, deb xabar berdi Sputnik.
Perm shahrida 17-avgust kuni soat 17:00 atrofida 53-sonli avtobus do‘kon devoriga urilib, avariyaga uchradi. YTH oqibatida bir kishi halok bo‘ldi, 32 dan ortiq kishi jarohatlandi.
Jarohatlanganlarga birinchilardan bo‘lib yordam ko‘rsatgan inson bokschi Danil Yo‘ldoshev. U o‘sha paytda mashg‘ulotga ketayotgandi. YTHga uchragan avtobusni ko‘rgan yigit jabrlanuvchilarga yordam ko‘rsatish uchun to‘xtadi. Avtobusning eshiklari yopilib qolgan, ular ochilmas edi. Danil orqa eshikni tepib sindirib, avtobus ichiga kirdi va odamlarni tashqariga chiqara boshladi.
“Men bu vaziyatda o‘zimni boshqacha tuta olmas edim. Meni shunday tarbiyalashgan”, — deydi Danil.
Avtobus salonidagi yo‘lovchilarning aksariyati jarohatlangan, ularning yuzini oyna siniqlari kesib ketgan edi. Shuningdek, salonda qo‘rquv va og‘riqdan yig‘layotgan bolalar ham bor edi.
Yo‘ldoshev ko‘chadagi mashinalarni to‘xtatib, odamlarni kasalxonaga olib borishni so‘radi.
Tez tibbiy yordam brigadasi kelganida esa u tibbiyot xodimlariga jabrlanuvchilarni mashinaga ortishga ko‘maklashdi.
Danil Yo‘ldoshev Permga Toshkentdan borgan. U Rossiyada maktab va texnikumni tamomlagan. Hozirgi kunda klubda qo‘riqchi bo‘lib ishlaydi.
Uning qarindoshlari O‘zbekistonda yashaydi. Danil jabrlanganlarga ko‘rsatgan yordami uchun mukofotlanishi mumkin.
Izoh (0)