An’anaviy tarzda har yili o‘tkazib kelinayotgan “Dance Music Fest” musiqiy festivali bu safar “Ashxobod” madaniyat va istirohat parkida tashkil etildi. Bu haqda turizmni rivojlantirish davlat qo‘mitasi matbuot xizmati ma’lum qildi.
“Elektron musiqa festivali 3 yildan buyon o‘tkazib kelinmoqda va yildan yilga unga qiziqish bildirayotgan kishilar soni ortib bormoqda. Bu yil siz yanada ko‘proq musiqa, ham mahalliy, ham xorijiy DJlarning chiqishlaridan bahra olishingiz mumkin. Uch kun davomida yig‘ilganlarni fransiyalik Dj Bens, Rompasso nomi ostida ijod qiluvchi rossiyalik DJ va prodyuser Roman Krilov, fransiyalik DJ, qo‘shiqchi va bastakor Uilli Uilyam, niderlandiyalik DJ Janob Uayt, rossiyalik prodyuser va DJ Shapov, belgiyalik DJlar dueti Double Pleasure, niderlandiyalik DJ va musiqiy prodyuser Quintino va belaruslik rep-ijrochisi CYGO turfa xil kompozitsiyalar bilan siylaydi. Dam olish kunlarini do‘stlaringiz davrasida a’lo kayfiyatda o‘tkazishni istasangiz, albatta, “Ashxobod” parkiga tashrif buyuring!”, – deydi festival bosh tashkilotchisi “Art Uz Promotion Agency” direktori Muzaffar Siddiqov.
“Eslatib o‘tamiz, festival 18-avgustga qadar davom etadi”, deyiladi xabarda.
“Dance Music Fest 2019” festivalini yig‘ilganlarning davomli olqishlari ostida Bosh vazir o‘rinbosari Aziz Abduhakimov ochib berdi.
“Bugun biz barchamizni musiqa atrofida birlashtirib turgan ajoyib tadbirdamiz. O‘ylashimcha, bu kabi musiqa bayramlarini tez-tez o‘tkazib turishimiz kerak. Biz uch kun davomida ajoyib musiqalardan bahramand bo‘lamiz. Keling, hayotdan zavq olib, musiqa bayramini birgalikda nishonlaylik!”, - dedi Aziz Abduhakimov musiqa festivaliga start berar ekan.
Izoh (0)