“Daryo” internet-nashrida “Qarshi tumanidagi bog‘cha va maktablarga majburiy tartibda bilet sotilmoqda” sarlavhali maqola chop etildi. Mazkur maqolaga tuman hokimligi matbuot xizmati quyidagicha munosabat bildirdi.
O‘zbekiston xotin-qizlar qo‘mitasiga Farg‘ona viloyati Bog‘dod tumani “Abduvohid Salomat” oilaviy korxonasining 2019-yil 25-iyuldagi 174-sonli murojaat xati kelib tushgan. Unda O‘zbekiston Respublikasi davlat Mustaqilligining 28 yilligi munosabati bilan jonli muloqot, ijodiy uchrashuvlar hamda madaniy tadbirlarni tashkil etish taklifi bildirilgan. O‘zbekiston xotin-qizlar qo‘mitasining №08/1489-19-sonli xatiga asosan, Qashqadaryo viloyati xotin-qizlar qo‘mitasining 2019-yil 26-iyul kungi 08/135-sonli xati ishlab chiqilib, viloyatdagi barcha tuman xotin-qizlar qo‘mitasi raislariga 350 donadan biletlar tarqatilgan.Qashqadaryo viloyati maktabgacha ta’lim boshqarmasi boshlig‘i Asror Alimardonovning “Daryo”ga ma’lum qilishicha, Qarshi tumani maktabgacha ta’lim bo‘limi boshlig‘i Anvar Eshonqulov boshqarma boshlig‘iga “yuqori”dan 100 dona bilet berilganligini, bo‘lim tarkibidagi muassasalarga sotishga ruxsat berishini so‘ragan. Boshqarma boshlig‘i esa buni rad etib, taqiqlanganligini eslatgan.Ushbu biletlar aslida “Qalpoq” hajviy guruhi konserti uchun sotilishi belgilangan. Tuman matbuot xizmati ushbu masalaga oydinlik kiritish maqsadida o‘rganish o‘tkazdi. Tumandagi bir qator maktab o‘qituvchilari va maktabgacha ta’lim muassasalari tarbiyachilari bilan suhbat o‘tkazdi. Suhbat jarayonida ular o‘zlariga majburiy tartibda bilet sotilmaganligini ma’lum qildi. Tuman xotin-qizlar qo‘mitasining bildirishicha, hozirga qadar 350 dona bilet sotuvga chiqarilmagan.
Qarshi tumani hokimligi matbuot xizmati
Tuman matbuot xizmati rahbari Otabek Usmonovning yozishicha, O‘zbekiston mustaqilligining 28 yilligi munosabati bilan “Jonajon O‘zbekistonim, mangu bo‘l omon” shiori ostida Qarshi tumanida 15-avgust kuni tuman hokimligi tomonidan bayram tadbiri tashkillashtirilgan. Unda tumanda faoliyat yuritayotgan san’atkorlar hamda Toshkent shahridan tashrif buyurgan O‘zbekistonda xizmat ko‘rsatgan artist Alisher Fayz taklif etilib, uning ijrosida konsert dasturi namoyish etilgan.
Bayram tadbirida 10 mingga yaqin tuman aholisi qatnashdi. Hech kimga bayram tadbirida ishtirok etishi uchun bilet sotilmagan. Qolaversa, ushbu bayram tadbirida “Qalpoq” hajviy guruhi ishtirok etmagan.
Matbuot xizmatining yozishicha, “Qalpoq” hajviy guruhi ishtirokidagi uchrashuv tuman madaniyat saroyida o‘tkazilishi belgilangan. 15-avgust kuni tumanning asosiy bayram tadbiri bo‘lishi munosabati bilan “Qalpoq” hajviy guruhi ishtirokidagi uchrashuv qoldirilgan.
Izoh (0)