15-avgust kuni OAV vakillarining jurnalistlik faoliyati davomida mas’ul mansabdor tomonidan tazyiqqa uchragani haqida material e’lon qilindi. Bu haqda Axborot va ommaviy kommunikatsiyalar agentligi eslatmoqda.
Matn va unga ilova qilingan videolavhada Toshkent shahri Olmazor tumani hokimi o‘rinbosari “Kun.uz” tahririyati muxbirlariga nomunosib, qo‘pol muomalada bo‘lgani, hatto kamerani olib qo‘yish tahdidi bilan tajovuz qilgani aks etgan.
Afsuski, bunday holatlar ayrim mansabdor shaxslarning qonunlardan bexabarligini ko‘rsatib qo‘ymoqda. Jumladan, “Ommaviy axborot vositalari to‘g‘risida”gi qonunning 5-moddasiga ko‘ra, ommaviy axborot vositalarining faoliyatiga to‘sqinlik qilish yoki aralashish taqiqlanadi.
“Jurnalistlik faoliyatini himoya qilish to‘g‘risida”gi qonunning 5-moddasiga muvofiq, jurnalist o‘z kasbiga doir faoliyatni amalga oshirish chog‘ida, jurnalist tekshiruvi o‘tkazish, mansabdor shaxs qabulida bo‘lish, ma’lumotlarni belgilangan tartibda yozib olish, shu jumladan, zarur texnika vositalaridan foydalangan holda yozib olish huquqiga ega.
Axborot va ommaviy kommuniuatsiyalar agentligi mansabdorlarning OAV vakillariga nisbatan nomunosib harakatlarini qoralaydi. “Jurnalistlik faoliyatini himoya qilish to‘g‘risida”gi qonunning 14-moddasiga ko‘ra, davlat idoralari, fuqarolarning o‘zini o‘zi boshqarish organlari, jamoat birlashmalari, korxonalar, muassasalar va tashkilotlarning mansabdor shaxslari jurnalistga tazyiq o‘tkazganlik, uning jurnalistlik faoliyatiga aralashganlik, jurnalistning materiallari va zarur texnika vositalarini g‘ayriqonuniy ravishda olib qo‘yganlik uchun javobgarlikka tortiladi.
“Jamiyatimizda qonun ustuvorligini ta’minlanish eng muhim va ustuvor vazifa sifatida yana kun tartibiga chiqmoqda. Zotan, u xoh mansabdor shaxs, xoh oddiy fuqaro, xoh jurnalist yoki bloger bo‘lsin, qonun oldida hamma barobardir.
O‘zbekiston Respublikasida so‘z erkinligini ta’minlash sohasida olib borilayotgan islohotlar jarayonida davlat organlari vakillarining jurnalist va blogerlar bilan konstruktiv munosabatda bo‘lishi, erkin axborot olish imkoniyatini ta’minlashi juda muhim. Chunki matbuot va so‘z erkinligi jamiyat taraqqiyotining eng muhim omilidir”, — deyiladi xabarda.
Izoh (0)