«Дарё» интернет-нашрида «Қарши туманидаги боғча ва мактабларга мажбурий тартибда билет сотилмоқда» сарлавҳали мақола чоп этилди. Мазкур мақолага туман ҳокимлиги матбуот хизмати қуйидагича муносабат билдирди.
Ўзбекистон хотин-қизлар қўмитасига Фарғона вилояти Боғдод тумани «Абдувоҳид Саломат» оилавий корхонасининг 2019 йил 25 июлдаги 174-сонли мурожаат хати келиб тушган. Унда Ўзбекистон Республикаси давлат Мустақиллигининг 28 йиллиги муносабати билан жонли мулоқот, ижодий учрашувлар ҳамда маданий тадбирларни ташкил этиш таклифи билдирилган. Ўзбекистон хотин-қизлар қўмитасининг №08/1489-19-сонли хатига асосан, Қашқадарё вилояти хотин-қизлар қўмитасининг 2019 йил 26 июль кунги 08/135-сонли хати ишлаб чиқилиб, вилоятдаги барча туман хотин-қизлар қўмитаси раисларига 350 донадан билетлар тарқатилган.Қашқадарё вилояти мактабгача таълим бошқармаси бошлиғи Асрор Алимардоновнинг «Дарё»га маълум қилишича, Қарши тумани мактабгача таълим бўлими бошлиғи Анвар Эшонқулов бошқарма бошлиғига «юқори»дан 100 дона билет берилганлигини, бўлим таркибидаги муассасаларга сотишга рухсат беришини сўраган. Бошқарма бошлиғи эса буни рад этиб, тақиқланганлигини эслатган.Ушбу билетлар аслида «Қалпоқ» ҳажвий гуруҳи концерти учун сотилиши белгиланган. Туман матбуот хизмати ушбу масалага ойдинлик киритиш мақсадида ўрганиш ўтказди. Тумандаги бир қатор мактаб ўқитувчилари ва мактабгача таълим муассасалари тарбиячилари билан суҳбат ўтказди. Суҳбат жараёнида улар ўзларига мажбурий тартибда билет сотилмаганлигини маълум қилди. Туман хотин-қизлар қўмитасининг билдиришича, ҳозирга қадар 350 дона билет сотувга чиқарилмаган.
Қарши тумани ҳокимлиги матбуот хизмати
Туман матбуот хизмати раҳбари Отабек Усмоновнинг ёзишича, Ўзбекистон мустақиллигининг 28 йиллиги муносабати билан «Жонажон Ўзбекистоним, мангу бўл омон» шиори остида Қарши туманида 15 август куни туман ҳокимлиги томонидан байрам тадбири ташкиллаштирилган. Унда туманда фаолият юритаётган санъаткорлар ҳамда Тошкент шаҳридан ташриф буюрган Ўзбекистонда хизмат кўрсатган артист Алишер Файз таклиф этилиб, унинг ижросида концерт дастури намойиш этилган.
Байрам тадбирида 10 мингга яқин туман аҳолиси қатнашди. Ҳеч кимга байрам тадбирида иштирок этиши учун билет сотилмаган. Қолаверса, ушбу байрам тадбирида «Қалпоқ» ҳажвий гуруҳи иштирок этмаган.
Матбуот хизматининг ёзишича, «Қалпоқ» ҳажвий гуруҳи иштирокидаги учрашув туман маданият саройида ўтказилиши белгиланган. 15 август куни туманнинг асосий байрам тадбири бўлиши муносабати билан «Қалпоқ» ҳажвий гуруҳи иштирокидаги учрашув қолдирилган.
Изоҳ (0)