Bolalarga nisbatan qilinayotgan bulling (“ta’qib va zo‘ravonlik”) masalasini huquqiy tartibga solish vaqti keldi. Bu haqda 6-avgust kuni Inson huquqlari milliy markazi direktori Akmal Saidov jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Hozirgi kunda dunyoda, jumladan, O‘zbekistonda ham ko‘pchilik bolalar maktab davridanoq bulling (“ta’qib va zo‘ravonlik”) qurboniga aylanib qolmoqda. Ta’qib deganda, odatda, tahqirlash, ustidan kulish, ataylab e’tibor bermaslik, kamsitish va kaltaklash tushuniladi. Bunga sabab — sinfdoshlar orasida hukmronlik qilishga intilish. Har qanday zo‘ravonlik va ta’qib qurbonning ruhiyatiga zarar yetkazadi. Tadqiqotga ko‘ra, ta’qibga uchragan bolalarning sog‘lig‘i, xususan, ruhiy sog‘lig‘i ham yomonlashadi. Yoshlar yolg‘izlanib, ularda tushkunlik va ojizlik, vahima hissi shakllanadi. Ba’zilari o‘z joniga qasd qiladi.
“Daryo” muxbiri dolzarb masalalardan biriga aylangan bullingning oldini olish borasida O‘zbekiston Inson huquqlari milliy markazi qanday ishlarni amalga oshirayotgani haqida savol bilan murojaat qildi.
Savolga markaz rahbari Akmal Saidov quyidagicha javob berdi: “Maktablarda ro‘y berayotgan bu kabi hollar OAV hamda ijtimoiy tarmoqlarda qanchalik keng tarqalgani bo‘yicha xabardor emasman va bu vakolatimga kirmaydi. Lekin mana bunday kamsitishlarni huquqiy tartibga solish kerak. Oldin shu kabi muammo bu darajada ko‘tarilmagan. Hatto bu iborani eshitmagan va e’tibor bermagan ekanman. Bu yangi ijtimoiy voqelik. Men Rossiya matbuotida qizlar o‘z dugonasini vahshiyona tarzda urganini ko‘rgan edim va bu juda ham noxush holat. Birinchi o‘rinda bu yerda, albatta, tarbiyaviy va maktabdagi muhitning nosog‘lomligi bo‘lsa, ikkinchidan buni huquqiy tartibga solish vaqti kelibdi”.
Markaz rahbari ushbu masalani o‘rganib chiqib, qonun yo‘li bilan tushuncha berilishi lozimligini qo‘shimcha qildi.
Ma’lumot uchun, BMT tadqiqotida aytilishicha, yoshlarning uchdan ikki qismi maktabda ta’qibga uchraydi. Ko‘p hollarda bolalar maktabdagi nizolarni kattalardan berkitadi. Har uchinchi bolaning o‘zi ham ta’qibda bir necha bor ishtirok etgan.
Izoh (0)