Rossiyaning Sibir o‘lkasida kuchli o‘rmon yong‘inlari sodir bo‘lmoqda. Ushbu munosabat bilan Irkutsk, Krasnoyarsk, Buryatiya va Yakutiyaning alohida hududlarida favqulodda holat e’lon qilingan, deb ma’lum qiladi Sputnik.
“Bugungi kun holatida o‘rmon yong‘inlarining umumiy maydoni 2,7 million gektarni tashkil qiladi. Bu o‘tgan yilga nisbatan 12 foizga ko‘p”, — deyilgan xabarda.
Bosh vazirning tabiat resurslari bo‘yicha o‘rinbosari Dmitriy Kobilkin aytishiga qaraganda, bu yilgi o‘rmon yong‘inlarining asosiy sababi — yuqori havo haroratining (+30 dan yuqori) uzoq muddat davomida saqlanib turishi, yog‘ingarchilik kamligi va quruq chaqmoqlar.
Mutaxassislar Sibir va Tayga o‘rmonlarida 500 dan ortiq yong‘in o‘chog‘larini aniqlagan. Asosiy o‘rmon yong‘in paydo bo‘lgan hududlar aholi yashaydigan punktlardan yiroq, texnika yetib borishi qiyin bo‘lgan hududlarda joylashgani tufayli ularni o‘chirishning iloji yo‘q.
Ayni damda Favqulodda vaziyat vazirligining 95% xodimlari va kuchlari ushbu yong‘inlarni o‘chirishga safarbar qilingan. Rossiya Gidrometeorologiya markazi tutunlar tarqalishini nazorat qilib, aholi punktlarida havo tozaligini tekshirib turmoqda.
Izoh (0)