ССВ: Ёш болалар ўртасида вазн ортиб кетиши кўпаймоқда. Бонг уриб қонун қабул қилмайдиган бўлсак, вақтни бой бериб қўйган бўламиз

Ўзбекистонда ёш болалар ўртасида семириб кетиш ҳолати кўпаймоқда. Бу ҳақда 23 июль куни Соғлиқни сақлаш вазирлиги вакиллари журналистлар билан бўлиб ўтган очиқ мулоқотда айтиб ўтилди, дея хабар бермоқда «Дарё» мухбири Мусулмонбек Иброҳимов.

Анжуманда Соғлиқни сақлаш вазирлиги ҳузуридаги Тиббий-ижтимоий хизматлар агентлиги директори Алишер Иноқов «Эрта ёшдаги болалар ва гўдакларни овқатлантириш тўғрисида»ги қонун лойиҳаси ҳақида изоҳ берди.

«Сўнгги вақтларда ёш болалар ўртасида семириб кетиш кўп кузатилмоқда. Биз болани илиги тўқ бўлиши учун кўп овқат ейиши керак, деймиз. Баъзи бир хонадонларда дастурхон кун бўйи йиғиштирилмайди, бола айланиб келиб яна овқатланаверади. Меъёрга қараб овқатланиш ёддан кўтарилди. Статистика шуни кўрсатмоқдаки, ёш болалар ўртасида вазн ортиб кетиши кўпаймоқда. Бу диабет, юрак етишмовчилигига олиб келади. Натижада, соғлом авлодни тарбиялай олмай қоламиз. Шунинг учун ҳам, мана шу қонун лойиҳасининг асосий вазифаларидан бири шуки, тўғри овқатлантириш орқали болаларни нормал ҳолатда вояга етказиш», — деди Алишер Иноқов.

Вазирлик вакилининг қўшимча қилишича, қонун лойиҳасида болалар ошхоналари учун алоҳида тартиб киритилмоқда.

«Болаларга кўпроқ фаст-фуд овқатларни едириб, газланган ичимликларни ичирамиз. Аниқландики, фаст-фуд болалар саломатлиги учун зарар экан. Шунинг учун, ушбу қонунда болалар ошхоналарида қанақа овқатлар бўлиши, қандай тартибда овқат берилиши, қандай меъёрлар бўлиши кераклиги каби масалаларга алоҳида эътибор берилмоқда. Бонг уриб ушбу қонунни қабул қилмайдиган бўлсак, вақтни бой бериб қўйган бўламиз», — дея қўшимча қилди у.

Болаларнинг овқатланиши аввал қандай тартибга солинган ва ушбу қонун лойиҳасида қандай ўзгаришлар назарда тутилаётгани ҳақидаги саволга мутасаддилар жавоб бермади.

Шунингдек, Ахборот ва оммавий коммуникациялар агентлиги берган эълонга кўра, анжуманда Соғлиқни сақлаш вазири ўринбосари Баҳодир Низомов иштирок этиши керак эди, лекин вазирлик раҳбарияти иштирок этмади ва бунга ҳам мутасаддилар томонидан ҳеч қандай изоҳ берилмади. Шунданми, журналистлар томонидан йўлланган кўплаб саволлар очиқ қолди.