Oliy Majlis Qonunchilik palatasida O‘zbekiston “Adolat” sotsial-demokratik partiyasi fraksiyasining yig‘ilishi bo‘lib o‘tdi.
Unda O‘zbekiston “Adolat” SDP fraksiyasi deputatlari, partiya faollari, ekspertlar, Vazirlar Mahkamasi mas’ul xodimlari, Davlat yo‘l harakati xavfsizligi va “O‘zstandart” agentligi mutaxassislari ishtirok etmoqda.
Yig‘ilishni O‘zbekiston “Adolat” SDP fraksiyasi rahbari Narimon Umarov olib bormoqda.
Yig‘ilishda dastlab Prezident raisligida 15-iyul kuni uzluksiz professional ta’lim tizimini yanada takomillashtirish masalalariga bag‘ishlangan yig‘ilishda ko‘tarilgan muhim vazifalar muhokama etildi.
Fraksiya a’zolari havo haroratining keskin isib ketishi bilan bog‘liq vaziyatga e’tibor qaratdi.
O‘zbekiston “Adolat” SDP fraksiyasi a’zosi Umid Sulaymonovning ta’kidlashicha, bu yilgi yoz fasli kamdan-kam kuzatiladigan issiq harorat bilan o‘tmoqda. Ayniqsa, bunday jazirama kunlar avtomobil haydovchilariga qiyinchilik tug‘dirmoqda. Shu bois, ijtimoiy tarmoqlarda keng jamoatchilik, ayniqsa, haydovchilar tomonidan qizg‘in bahs-munozaraga sabab bo‘layotgan mavzu – avtomobil oynalarini qoraytirish (“tonirovka”) masalasi bo‘lib turibdi.
Yig‘ilishda ta’kidlanganidek, “Adolat” SDP fraksiyasi deputatlariga xalqimiz tomonidan haydovchi va yo‘lovchilarni yozning jazirama issig‘idan himoya qilishda yetarlicha sharoitlar yaratish masalasi bo‘yicha ko‘plab murojaatlar kelib tushmoqda. Murojaatlarda asosiy masala sifatida yozning issig‘idan, quyosh nuridan, ayniqsa, ultrabinafsha nurlaridan saqlanishda avtomobil oynalarini qoraytirishga ruxsat berish so‘ralgan.
Haydovchi ham pul to‘lamoqda, ham jaziramada qolmoqda.
Biroq Vazirlar Mahkamasining “Tusi o‘zgartirilgan (qoraytirilgan) oynali yengil avtotransport vositalaridan foydalanishni tartibga solish chora-tadbirlari to‘g‘risida”gi qaroriga muvofiq oynalarining tusini o‘zgartirishga (qoraytirishga) ruxsatnoma olish jismoniy shaxslar uchun — eng kam oylik ish haqining 90 baravari, yuridik shaxslar uchun — eng kam oylik ish haqining 120 baravari miqdoridagi mablag‘ni to‘lash orqali amalga oshiriladi. Tabiiyki, ko‘plab fuqarolarimizda buncha mablag‘ to‘lash evaziga bir yilgagina ruxsatnoma olishga moddiy imkoniyat yetarli emas.
Deputatlar tomonidan ta’kidlanganidek, agar ushbu summani to‘lashga haydovchining qurbi yetsa ham, unga buning issiqdan himoyalanishga hech qanday nafi bo‘lmaydi. Chunki qarorga asosan, oynalarining tusini o‘zgartirish avtotransport vositasining faqatgina orqa oynalariga ruxsat beriladi, xolos. Demak, haydovchi qaror talablarini bajaraman, deb pul to‘laydi va o‘zi yana o‘sha quyosh nurlarida qoladi.
Albatta, bugungi kunda ijtimoiy tarmoqlarda, turli veb-saytlarda bu narxning juda qimmatligi, uni butunlay bekor qilish yoki mablag‘ miqdorini kamaytirish, darpardaga ruxsat berish to‘g‘risida takliflar bildirilmoqda. Ichki ishlar vazirligi mutasaddilari esa mablag‘ miqdorini o‘zgartirishga hech qanday munosabat bildirmagan holda, oynalarining tusini o‘zgartirish fuqarolarimiz xavfsizligiga salbiy ta’sir o‘tkazishini ma’lum qilish bilan cheklanmoqda.
O‘zbekiston “Adolat” SDP fraksiyasi a’zolari fuqarolarimizni qiynayotgan ushbu masala yuzasidan, aholi fikrlari, ijtimoiy tarmoqlardagi munosabatlar va mutasaddi vazirlik pozitsiyasini o‘rganib, ham xalq manfaatlari, ham xavfsizlik talablarini inobatga olgan holda, o‘z takliflarini ishlab chiqdi.
Bugungi kunda avtotransport vositalariga ehtiyot qismlari bilan savdo qilish do‘konlarida termal plyonkani uchratish mumkin. Ushbu plyonka bir muncha shaffof bo‘lib, u avtomobil salonini quyoshning ultrabinafsha nurlaridan saqlab, jaziramada isib ketishini birmuncha kamaytiradi.
Deputatlarning ushbu tashabbusini yig‘ilishda hozir bo‘lgan Vazirlar Mahkamasi mas’ul xodimlari, Davlat yo‘l harakati xavfsizligi va “O‘zstandart” agentligi mutaxassislari qo‘llab-quvvatladi va bu orqali fuqarolarimizga avtomobildan foydalanishlari uchun qulay shart-sharoit yaratilishi ta’kidlandi.
Deputatlar e’tirof etganidek, ushbu masalada muammoning yechimi sifatida Hukumat qaroriga tegishli o‘zgartirish kiritishni nazarda tutuvchi taklif tayyorlanmoqda. Ya’ni, Yo‘l harakati qoidalarining 3-ilovasi 7.4-bandiga muvofiq transport vositasining old, yon va orqa oynalarining yorug‘lik o‘tkazuvchanligi 70 foizdan kam bo‘lsa, undan foydalanish taqiqlanishi belgilangan normani qayta ko‘rib chiqish maqsadga muvofiq. Unga ko‘ra, mamlakatimizda ushbu 70 foiz cheklovi 55 foizga tushirilsa, haydovchilar bemalol termal plyonkadan foydalanishi mumkin bo‘ladi. Bu esa, nafaqat yo‘lovchilarga, balki, haydovchilarga ham afzallik tug‘diradi. Deputatlar, shuningdek, ushbu amaliyotni jamoat transportlarida ham qo‘llash taklifini ilgari surdi.
Deputatlar shuningdek ijtimoiy tarmoqlarda keng muhokamalarga sabab bo‘layotgan avtomobil oynalarini tusini o‘zgartirish (tonirovka) masalasini ham muhokama qildi.
Izoh (0)