IIV huzuridagi Jazoni ijro etish bosh boshqarmasi bo‘limi boshlig‘i Bahodir Yusupov mahkuma Gulnora Karimova o‘z huquqlaridan foydalanib kelayotganini ta’kidladi. Bu haqda 17-iyul kuni IIV huzuridagi Jazoni ijro etish bosh boshqarmasi (JIEBB) vakillari jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Anjumanda JIEBB Davolash profilaktika yordamini tashkillashtirish bo‘limi boshlig‘i Bahodir Yusupov mahkuma Gulnora Karimova O‘zbekiston Jinoyat-ijroiya kodeksining bir nechta moddalarida nazarda tutilgan huquqlardan foydalanib kelayotganini ma’lum qildi.
“O‘zbekiston Jinoyat-ijroiya kodeksining 78-moddasiga binoan mahkuma Gulnora Karimova posilkalar, yo‘qlovlar, banderollar va pul jo‘natmalari olish va yuborish huquqidan foydalangan va foydalanib kelmoqda. Jumladan, Karimova 2019-yilning 2–3, 10-aprel, 10-iyun va 13–15-iyul kunlari unga tegishli yo‘qlovlar hamda banderollarni qabul qilgan”, — dedi Bahodir Yusupov.
Jazoni ijro etish bosh boshqarmasi vakilining qo‘shimcha qilishicha, Gulnora Karimova mahkumning uzoq muddatli uchrashuvi huquqidan ham foydalanib kelmoqda.
“Gulnora Karimova O‘zbekiston Jinoyat-ijroiya kodeksining 76-moddasiga muvofiq mahkumning uchrashuv huquqidan foydalanmoqda va foydalanishda davom etmoqda. Xususan, Karimova 2019-yilning 12–15-aprel hamda 7–10-iyun kunlari oralig‘ida oila a’zolari bilan uzoq muddatli uchrashuvda bo‘lgan. Uzoq muddatli uchrashuv qonunchiligimizda 3 sutka qilib belgilangan. Bu huquqdan Karimova to‘laqonli foydalangan va foydalanib kelmoqda”, — dedi Yusupov.
Oldinroq, IIV huzuridagi Jazoni ijro etish bosh boshqarmasi Gulnora Karimova 2017-yil dekabr oyida Sog‘liqni saqlash vazirligi sud-tibbiy ekspertizasidan o‘tkazilganda unda ma’lum bir surunkali kasalliklar aniqlanganini ma’lum qilgan edi.
Izoh (0)