Veterinariya va chorvachilikni rivojlantirish davlat qo‘mitasi internet nashrlarda e’lon qilingan Zangiota tumanida o‘tkazilgan seminardagi holat yuzasidan chiqishlarga munosabatini bildirdi.
Qishloq ho‘jaligi fanlari doktori, fan arbobi, akademik Ubaydulla Nosirovning fikriga ko‘ra, buqani buqaga sakratib urug‘ olish tajribasi butun dunyoda, jumladan, Germaniya, Bolgariya, Vengriya, Xitoy, Isroil kabi ko‘plab davlatlarda ommalashgan jarayon bo‘lib, buning ilmiy jihatdan isbotlangan qator afzalliklari mavjud.
Bu avvalo, ishonchli va xavfsiz usul. Yana shuningdek, mutaxassislar tomonidan urug‘ olishda sigirdan foydalanish tavsiya qilinmaydi. Sababi nasldor buqalarning vazni 1 tonnadan ortiq, hatto 1.5 tonnaliklari ham bor. Bunday holda sigirga zarar yetkazilishi istisno etib bo‘lmas holatdir. Yana bir jihati, buqa sigirni qochirib qo‘yishi mumkin. Shu sababli maxsus dastgohga asosan urug‘ berishdan qolgan yoki bo‘yi pastroq yuvvosh buqalar bog‘lanadi.
Telejurnalist Sobir Mirzayev joriy yil 15-iyun kuni Toshkent viloyatining Zangiota tumanida “Chorvachilikda naslchilik ishlarini nazorat qilishga doir qonunchilik ijrosi” mavzusida respublika mintaqaviy o‘quv-seminarida mavzuga oid zaruriy asoslangan ma’lumotlarga ega bo‘lmasdan turib, professional jurnalist kasb etikasi, kasbga oid odob-axloq qoidalariga rioya etmasdan soha xodimlarining sha’ni, qadr-qimmatiga hurmatsizlik qilib, ijtimoiy tarmoqda farosatsizlik, ko‘zbo‘yamachilik, mas’uliyatsizlik va bilimsizlikda ayblagan.
O‘zini professional hisoblagan jurnalist avvalo o‘zga shaxslarni hurmat qilishi hamda qonun ustuvorligiga amal qilishi lozim deb hisoblaymiz.
Yurtimizdagi chorvachilik yo‘nalishidagi deyarli barcha fermer xo‘jaliklari va aholining katta qismi sunniy urug‘lantirishning zotli nasl olishdagi foydali jihatlarini to‘liq anglab yetganliklari uchun ham bugungi kunda ushbu usulga talab oshib bormoqda. Ushbu ehtiyojni yetarli darajada qondirish, chorvachilikda sof genofondni saqlab qolish va rivojlantirish, ilmiy-tadqiqot muassasalari tomonidan ishlab chiqilgan seleksiya-naslchilik dasturlarini amaliyotga tatbiq etish, chorvachilikda nasldorlik va mahsuldorlik sifatlarini yaxshilash maqsadida sun’iy urug‘lantirishni tashkil etish, seleksiya-naslchilik ishlarini takomillashtirish borasida qo‘mita va uning huzuridagi “O‘zbekchorvanasl” agentligi tomonidan tizimli ishlar olib borilmoqda.
Xususan, naslchilik xo‘jaliklarining moddiy-texnik bazasini yanada mustahkamlash, jahon tajribasini o‘rganib, yurtimizda keng joriy qilish maqsadida kadrlarni yetakchi xorijiy davlatlarga amaliyotga yuborish izchillik bilan davom ettirilmoqda.
Qo‘mita kelgusida ham veterinariya, chorvachilik va naslchilik sohasida amalga oshirilayotgan islohotlarni keng aholi e’tiboriga haqqoniy yetkazishda OAV, xususan, jurnalist S.Mirzayev bilan hamkorlikka doim tayyor ekanligini bildiradi. Veterinariya va chorvachilikni rivojlantirish davlat qo‘mitasi veterinariya, chorvachilik va naslchilik sohasida yagona davlat siyosatini amalga oshiruvchi organ sifatida yuqoridagi kabi maqolalar chorvachilik bilan shug‘ullanuvchi tajribali xalqimizni chalg‘itishdan boshqa narsa emasligini ta’kidlagan holda, ularni naslchilik seleksiyasi sohasidagi zamonaviy yutuqlardan keng foydalanishga chorlab qoladi.
Izoh (0)