Samarqand viloyati Payariq tumani Davlat xizmatlari markazida OTMlarga hujjat topshirish uchun kelgan abituriyentlarning jaziramada navbatda turganiga Davlat xizmatlari agentligi munosabat bildirdi.
Davlat test markazining ma’lumotiga ko‘ra, haqiqatan ham Samarqand davlat universiteti joriy yilda abituriyentlar orasida eng talabgor hisoblanadi va unga 20 mingdan ortiq abituriyent hujjat topshirgan.
Ta’kidlanishicha, DXMlarda navbat paydo bo‘lishi sabablaridan biri — ular hozircha ilgari mavjud bo‘lgan “Yagona darcha” markazlari binosida joylashganidir. Ammo avvalgi markazlardan farqli o‘laroq, ko‘rsatilayotgan xizmatlar ko‘payib, tashrif buyuruvchilar soni bir necha marotabaga oshgan.
“Davlat xizmatlari agentligi ushbu muammoni bartaraf etishga qaratilgan ishlarni olib bormoqda. Bugungi kunga qadar respublika bo‘ylab 30 ga yaqin zamonaviy, har tomonlama qulayliklarga ega va so‘nggi texnologik yechimlarni o‘z ichiga olgan Davlat xizmatlari markazlari foydalanishga topshirildi. Xususan, Samarqand viloyati Payariq tumani Davlat xizmatlari markazi zamonaviy binosini joriy yilning noyabr oyida foydalanishga topshirish rejalashtirilgan”, — deyiladi xabarda.
Shuningdek, qabul qilish jarayoni qulayroq bo‘lishi uchun yaqinda Davlat xizmatlari agentligi tomonidan belgilangan ro‘yxatdagi OTMlarga hujjatlarni tunu kun — 24 soat davomida topshirish imkoniyati yaratilgani bildirlgan.
“Shu bois, hurmatli abituriyentlarimizga jazirama issiqda navbatda turmasdan o‘zlariga qulay bo‘lgan vaqtda Davlat xizmatlari markazlariga tashrif buyurishlarini tavsiya qilamiz”, — deb qo‘shimcha qilingan xabarda.
Izoh (0)