Ветеринария ва чорвачиликни ривожлантириш давлат қўмитаси интернет нашрларда эълон қилинган Зангиота туманида ўтказилган семинардаги ҳолат юзасидан чиқишларга муносабатини билдирди.
Қишлоқ ҳўжалиги фанлари доктори, фан арбоби, академик Убайдулла Носировнинг фикрига кўра, буқани буқага сакратиб уруғ олиш тажрибаси бутун дунёда, жумладан, Германия, Болгария, Венгрия, Хитой, Исроил каби кўплаб давлатларда оммалашган жараён бўлиб, бунинг илмий жиҳатдан исботланган қатор афзалликлари мавжуд.
Бу аввало, ишончли ва хавфсиз усул. Яна шунингдек, мутахассислар томонидан уруғ олишда сигирдан фойдаланиш тавсия қилинмайди. Сабаби наслдор буқаларнинг вазни 1 тоннадан ортиқ, ҳатто 1.5 тонналиклари ҳам бор. Бундай ҳолда сигирга зарар етказилиши истисно этиб бўлмас ҳолатдир. Яна бир жиҳати, буқа сигирни қочириб қўйиши мумкин. Шу сабабли махсус дастгоҳга асосан уруғ беришдан қолган ёки бўйи пастроқ юввош буқалар боғланади.
Тележурналист Собир Мирзаев жорий йил 15 июнь куни Тошкент вилоятининг Зангиота туманида «Чорвачиликда наслчилик ишларини назорат қилишга доир қонунчилик ижроси» мавзусида республика минтақавий ўқув-семинарида мавзуга оид зарурий асосланган маълумотларга эга бўлмасдан туриб, профессионал журналист касб этикаси, касбга оид одоб-ахлоқ қоидаларига риоя этмасдан соҳа ходимларининг шаъни, қадр-қимматига ҳурматсизлик қилиб, ижтимоий тармоқда фаросатсизлик, кўзбўямачилик, масъулиятсизлик ва билимсизликда айблаган.
Ўзини профессионал ҳисоблаган журналист аввало ўзга шахсларни ҳурмат қилиши ҳамда қонун устуворлигига амал қилиши лозим деб ҳисоблаймиз.
Юртимиздаги чорвачилик йўналишидаги деярли барча фермер хўжаликлари ва аҳолининг катта қисми сунний уруғлантиришнинг зотли насл олишдаги фойдали жиҳатларини тўлиқ англаб етганликлари учун ҳам бугунги кунда ушбу усулга талаб ошиб бормоқда. Ушбу эҳтиёжни етарли даражада қондириш, чорвачиликда соф генофондни сақлаб қолиш ва ривожлантириш, илмий-тадқиқот муассасалари томонидан ишлаб чиқилган селексия-наслчилик дастурларини амалиётга татбиқ этиш, чорвачиликда наслдорлик ва маҳсулдорлик сифатларини яхшилаш мақсадида сунъий уруғлантиришни ташкил этиш, селексия-наслчилик ишларини такомиллаштириш борасида қўмита ва унинг ҳузуридаги «Ўзбекчорванасл» агентлиги томонидан тизимли ишлар олиб борилмоқда.
Хусусан, наслчилик хўжаликларининг моддий-техник базасини янада мустаҳкамлаш, жаҳон тажрибасини ўрганиб, юртимизда кенг жорий қилиш мақсадида кадрларни етакчи хорижий давлатларга амалиётга юбориш изчиллик билан давом эттирилмоқда.
Қўмита келгусида ҳам ветеринария, чорвачилик ва наслчилик соҳасида амалга оширилаётган ислоҳотларни кенг аҳоли эътиборига ҳаққоний етказишда ОАВ, хусусан, журналист С.Мирзаев билан ҳамкорликка доим тайёр эканлигини билдиради. Ветеринария ва чорвачиликни ривожлантириш давлат қўмитаси ветеринария, чорвачилик ва наслчилик соҳасида ягона давлат сиёсатини амалга оширувчи орган сифатида юқоридаги каби мақолалар чорвачилик билан шуғулланувчи тажрибали халқимизни чалғитишдан бошқа нарса эмаслигини таъкидлаган ҳолда, уларни наслчилик селексияси соҳасидаги замонавий ютуқлардан кенг фойдаланишга чорлаб қолади.
Изоҳ (0)