Shavkat Mirziyoyev “Soliq ma’muriyatchiligini takomillashtirish bo‘yicha qo‘shimcha chora-tadbirlar to‘g‘risida”gi qarorga imzo chekdi, deb xabar bermoqda huquqshunos Xushnudbek Xudoyberdiyev.
Qarorga ko‘ra:
tadbirkorlik subyektlari aniqlangan soliqqa oid huquqbuzarlikni tan olib, soliq organlarining javobgarlikka tortish to‘g‘risidagi qarorini olgan kundan e’tiboran o‘n kun muddat ichida moliyaviy jarimalarni ixtiyoriy ravishda to‘lasa, tadbirkorlik subyektlarining mansabdor shaxslari yoki xodimlari yoxud tadbirkorlik faoliyati bilan shug‘ullanuvchi fuqarolar mazkur huquqbuzarlik uchun jinoiy va ma’muriy javobgarlikdan ozod etish tartibi o‘rnatiladi;
2020-yil 1-yanvardan boshlab qo‘shilgan qiymat solig‘ini to‘lashga o‘tadigan yuridik shaxslar va yakka tartibdagi tadbirkorlar davlat soliq xizmati organlarida ushbu soliqning to‘lovchisi sifatida majburiy hisobga olinadi va bu qo‘shilgan qiymat solig‘i summasini hisobga olishning sharti hisoblanadi;
chet el fuqarolari tomonidan O‘zbekiston chegarasini kesib o‘tishda xarid qilingan tovarlar uchun to‘langan qo‘shilgan qiymat solig‘ini qaytarish (“tax free”) tartibi joriy etiladi;
soliqlar bo‘yicha to‘lovlarni keyinchalik bo‘lib-bo‘lib foizi bilan qaytarish orqali kamaytirishni nazarda tutuvchi “investitsiyaviy soliq kreditlari” instituti joriy etiladi;
soliq to‘lovchi – yuridik shaxs yoki yakka tartibdagi tadbirkor unga nisbatan qo‘llanilgan moliyaviy jarimalar to‘g‘risidagi qarorni olgan kundan boshlab, qo‘llanilgan moliyaviy jarimalar miqdorining 50 foizini o‘n kun davomida ixtiyoriy ravishda to‘laganda, uni jarima summasining qolgan qismini to‘lashdan ozod etish bo‘yicha moliyaviy jarimalarni undirishning soddalashtirilgan tartibi joriy etiladi;
2019-yil 1-dekabrga qadar buxgalteriya hisobini amalga oshirish hamda soliq to‘lovchilar va soliq organlari o‘rtasida real vaqt rejimida ma’lumotlar almashish imkonini beradigan, soliq hisobotini topshirish tizimi bilan integratsiya qilingan buxgalteriya hisobining yagona axborot tizimi ishlab chiqiladi;
2020-yil 1-yanvardan boshlab Yagona axborot tizimidan foydalanuvchi tadbirkorlik subyektlarining moliyaviy-xo‘jalik faoliyati ushbu dasturiy mahsulotni qo‘llagan davrida tekshirilmaydi;
“UzTrans” yagona interaktiv axborot tizimi bazasida quyidagilarni ta’minlaydigan “Yuk tashishlar monitoringi” axborot platformasi ishlab chiqiladi;
Savdo-sanoat palatasi va Iste’molchilar huquqlarini himoya qilish jamiyatlari federatsiyasi bilan birgalikda insofli tadbirkorlarni rag‘batlantirish va jamoatchilik nazoratini rivojlantirish maqsadida “Chekni talab qil va sovg‘a yutib ol” ommaviy aksiyalari o‘tkaziladi;
Shuningdek, qaror bilan Soliq ma’muriyatchiligini takomillashtirish strategiyasi hamda Strategiyani amalga oshirish bo‘yicha “yo‘l xaritasi” tasdiqlandi.
Izoh (0)