Самарқанд вилояти Паяриқ тумани Давлат хизматлари марказида ОТМларга ҳужжат топшириш учун келган абитуриентларнинг жазирамада навбатда турганига Давлат хизматлари агентлиги муносабат билдирди.
Давлат тест марказининг маълумотига кўра, ҳақиқатан ҳам Самарқанд давлат университети жорий йилда абитуриентлар орасида энг талабгор ҳисобланади ва унга 20 мингдан ортиқ абитуриент ҳужжат топширган.
Таъкидланишича, ДХМларда навбат пайдо бўлиши сабабларидан бири — улар ҳозирча илгари мавжуд бўлган «Ягона дарча» марказлари биносида жойлашганидир. Аммо аввалги марказлардан фарқли ўлароқ, кўрсатилаётган хизматлар кўпайиб, ташриф буюрувчилар сони бир неча маротабага ошган.
«Давлат хизматлари агентлиги ушбу муаммони бартараф этишга қаратилган ишларни олиб бормоқда. Бугунги кунга қадар республика бўйлаб 30 га яқин замонавий, ҳар томонлама қулайликларга эга ва сўнгги технологик ечимларни ўз ичига олган Давлат хизматлари марказлари фойдаланишга топширилди. Хусусан, Самарқанд вилояти Паяриқ тумани Давлат хизматлари маркази замонавий биносини жорий йилнинг ноябрь ойида фойдаланишга топшириш режалаштирилган», — дейилади хабарда.
Шунингдек, қабул қилиш жараёни қулайроқ бўлиши учун яқинда Давлат хизматлари агентлиги томонидан белгиланган рўйхатдаги ОТМларга ҳужжатларни туну кун — 24 соат давомида топшириш имконияти яратилгани билдирлган.
«Шу боис, ҳурматли абитуриентларимизга жазирама иссиқда навбатда турмасдан ўзларига қулай бўлган вақтда Давлат хизматлари марказларига ташриф буюришларини тавсия қиламиз», — деб қўшимча қилинган хабарда.
Изоҳ (0)