Adliya vazirligi tomonidan Toshkent shahrida faoliyat yuritayotgan notariuslar ishtirokida notariatni nodavlat tizimga o‘tkazish masalasi muhokama qilindi. Vazirlikning jamoatchilik bilan aloqalar bo‘limi xabariga ko‘ra, unda Prezident Administratsiyasi mas’ul xodimlari ham ishtirok etdi.
Muhokama avvalida oxirgi yillarda notariat sohasida amalga oshirilayotgan islohotlar natijasida notariatning faol modeliga o‘tilgani, to‘lovlarni undirishda yagona billing tizimi joriy etilganligi, notariuslarni tanlash jarayonlari shaffof va ochiq tizimda amalga oshirib kelinayotganligi, notariat tizimiga axborot-kommunikatsiya texnologiyalari keng joriy etilayotganligi haqida so‘z yuritilgan.
Shuningdek, notarial harakatlarni amalga oshirishda aholiga yanada yengilliklar yaratish maqsadida bitta notarial harakatni turli notarial idoralarga borgan holda rasmiylashtirish, ayrim notarial harakatlarni notarial idoraga kelmasdan masofadan elektron raqamli imzodan foydalangan holda amalga oshirish tartibini joriy etish masalalari muhokama qilingan.
Majburiy notarial tasdiqlanadigan harakatlar doirasini qisqartirish, uy-joyni boshqa shaxsga o‘tkazishda, mol-mulk ijara va tekin foydalanish shartnomalarini tasdiqlashda ayrim hujjatlarni olish talablarini bekor qilish, axborot-texnologiyalari imkoniyatlaridan keng foydalanish masalalari ham muhokama qilindi.
Izoh (0)