“Daryo” saytida haftaning eng muhim va muhokamali xabarlari sharhini boshlaymiz.
Bangladeshning O‘zbekistonga tashrif buyurgan prezidenti Muhammad Abdul Hamid Buxoroda bo‘ldi. Chirchiqdagi to‘qimachilik korxonasiga tashrif buyurdi. Abdul Hamid Samarqanddagi tarixiy qadamjolarni ziyorat qildi. Imom al-Buxoriy majmuasida Qur’on tilovat qildi hamda O‘zbekiston haqida iliq fikrlar bildirdi.
Bangladesh Respublikasi O‘zbekiston bilan tekstil sohasida yaxshi savdo aloqalariga egadir.
* * *
O‘zbekistonda qishloq xo‘jaligi mahsulotlariga nisbatan belgilangan QQS imtiyozlari bekor qilinmoqda. 2019-yil 1-oktabrdan boshlab o‘zi ishlab chiqargan qishloq xo‘jaligi mahsulotlariga va O‘zbekistonda ishlab chiqarilgan oziq-ovqat mahsulotlariga nisbatan belgilangan qo‘shilgan qiymat solig‘i bo‘yicha imtiyozlarni bekor qilish rejalashtirilyapti. Paxta xomashyosini ishlab chiqaruvchilar 2019-yil hosilidan boshlab QQS to‘lashga o‘tadi. QQS bo‘yicha imtiyozlar faqat dori-darmon, kitob va gazeta-jurnallar uchun saqlab qolinadi.
* * *
“O‘zcharmsanoat” jamoatchilik va ekspertlar tanqididan so‘ng o‘z mahsulotini o‘tkazishning yo‘lini topdi va poyabzallarga import bojlarini oshirish to‘g‘risidagi prezident farmoni loyihasi uchun yangi taklifni taqdim etdi. Unda erkaklar poyabzali uchun 20 foiz ish haqi stavkasini belgilashni taklif qilingan (avvalroq barcha turdagi poyabzal uchun tavsiya etilgandi). Minimal chegara 3 dollar etib belgilanadi. Taklifga ko‘ra, “bolalar va ayollar poyabzallari bozorining o‘ziga xos xususiyatlaridan kelib chiqadigan bo‘lsak, boj stavkasi o‘zgarishsiz qolishi mumkin”.
Mahalliy ishlab chiqaruvchi o‘z mahsulotini o‘tkazish uchun proteksionistik choralarga qo‘l urishi azaldan yangilik emas. Avvalroq tadbirkor Zafar Hoshimov import oyoq kiyimlariga bojning oshirilishi kontrabandaning rivojlanishi va davlat budjetiga zarar yetishiga olib kelishini yozgan edi.
* * *
18-iyun kuni xalq ta’limi vaziri Sherzod Shermatov “Daryo”ga bergan eksklyuziv intervyusida maktab formasi kelayotgan o‘quv yilida majburiy bo‘lmasligini ma’lum qildi. Shunday qilib, maktab o‘quvchilari uchun majburiy forma joriy qilish 2024-yilgacha kechiktirildi. Maktab formasi joriy etilishiga tarafdor yoki qarshi tomonlarning asos-dalillari bilan tanishishni istasangiz, “Daryo” kolumnisti Yevgeniy Sklyarevskiyning “Maktab formasi – bahs uchun mavzu” maqolasini o‘qib chiqishingiz mumkin. Unda ikki tomonning o‘z haqiqatlari atroflicha yoritilgan.
* * *
Juda ko‘p bahslarga sabab bo‘lgan qurol olib yurishni tartibga soluvchi qonunni senatorlar ma’qulladi. Qonunda qurol turlari tasniflangan bo‘lib, u fuqaroviy qurol, xizmat quroli hamda jangovar quroldan iborat. Fuqaroviy qurol ov quroli, sport quroli va o‘zini o‘zi himoya qilish quroliga bo‘linadi. Unda qurolni va uning o‘q-dorilarini olish huquqiga ega bo‘lgan subyektlar ro‘yxati belgilangan.
Ushbu qonunni ko‘plab nashr va blogerlar fuqaroning qurol olib yurishiga ruxsat berilishi deya talqin qildi. Biroq bloger Shahnoza To‘raxo‘jayeva o‘z sahifasida izohlashicha, qonunda qurolga oid betartib munosabatlar tartibga solindi va unda fuqaroga o‘qotar qurol sotilishi bo‘yicha hech gap yo‘q. Aytib o‘tish lozimki, Telegram’dagi bir necha kanallar so‘rovnomasi natijalariga ko‘ra fuqarolarga o‘qotar qurollarga ruxsat berilishiga qarshilar soni 81–85 foizni tashkil qiladi (1, 2, 3)
* * *
Bu haftada O‘zbekiston bosh prokurori Otabek Murodov lavozimidan ozod etildi. Shu kuniyoq Oliy Majlis Senati raisi Nig‘matilla Yo‘ldoshev O‘zbekiston bosh prokurori etib tayinlandi.
Nig‘matilla Yo‘ldoshev asli yurist bo‘lib, avval bosh prokuror o‘rinbosari bo‘lib ishlagan.
2015-yildan beri to‘rtinchi marta prokuror almashdi. Ularning barchasi poraxo‘rlik aybi bilan ishdan olingan. Shu qatorda Otabek Murodovga ham jinoiy ish ochildi. Prezident Shavkat Mirziyoyev Senat yalpi majlisida chiqishida “u viloyat prokurorlaridan 100 ming, tuman prokurorlaridan 50 ming dollardan pora olgan”, deb aytdi.
* * *
Dayjestimizning bundan avvalgi xabarida Senat raisi bosh prokuror etib tayinlanganini yozdik. Uning bo‘shab qolgan o‘rniga esa Xotin-qizlar qo‘mitasi raisi Tanzila Norboyevaning tayinlanishi O‘zbekiston tarixida voqea deb qayd etildi. O‘zbekistonda birinchi marta Senatga ayol kishi raislik qiladi.
Tanzila Norboyeva andijonlik bo‘lib, mutaxassisligi pedagog, fan nomzodi unvoni bor. Tanzila Norboyevaning o‘rnini hozirgacha sog‘liqni saqlash vaziri o‘rinbosari bo‘lib ishlab kelayotgan Elmira Bositxonova egalladi.
“Daryo” yangiliklarini kuzatib boring. O‘zbekiston va dunyo xabarlaridan eng birinchi xabardor bo‘ling.
Izoh (0)