«Дарё» сайтида ҳафтанинг энг муҳим ва муҳокамали хабарлари шарҳини бошлаймиз.
Бангладешнинг Ўзбекистонга ташриф буюрган президенти Муҳаммад Абдул Ҳамид Бухорода бўлди. Чирчиқдаги тўқимачилик корхонасига ташриф буюрди. Абдул Ҳамид Самарқанддаги тарихий қадамжоларни зиёрат қилди. Имом ал-Бухорий мажмуасида Қуръон тиловат қилди ҳамда Ўзбекистон ҳақида илиқ фикрлар билдирди.
Бангладеш Республикаси Ўзбекистон билан текстил соҳасида яхши савдо алоқаларига эгадир.
* * *
Ўзбекистонда қишлоқ хўжалиги маҳсулотларига нисбатан белгиланган ҚҚС имтиёзлари бекор қилинмоқда. 2019 йил 1 октябрдан бошлаб ўзи ишлаб чиқарган қишлоқ хўжалиги маҳсулотларига ва Ўзбекистонда ишлаб чиқарилган озиқ-овқат маҳсулотларига нисбатан белгиланган қўшилган қиймат солиғи бўйича имтиёзларни бекор қилиш режалаштириляпти. Пахта хом ашёсини ишлаб чиқарувчилар 2019 йил ҳосилидан бошлаб ҚҚС тўлашга ўтади. ҚҚС бўйича имтиёзлар фақат дори-дармон, китоб ва газета-журналлар учун сақлаб қолинади.
* * *
«Ўзчармсаноат» жамоатчилик ва экспертлар танқидидан сўнг ўз маҳсулотини ўтказишнинг йўлини топди ва пойабзалларга импорт божларини ошириш тўғрисидаги президент фармони лойиҳаси учун янги таклифни тақдим этди. Унда эркаклар пойабзали учун 20 фоиз иш ҳақи ставкасини белгилашни таклиф қилинган (аввалроқ барча турдаги пойабзал учун тавсия этилганди). Минимал чегара 3 доллар этиб белгиланади. Таклифга кўра, «болалар ва аёллар пойабзаллари бозорининг ўзига хос хусусиятларидан келиб чиқадиган бўлсак, бож ставкаси ўзгаришсиз қолиши мумкин».
Маҳаллий ишлаб чиқарувчи ўз маҳсулотини ўтказиш учун протексионистик чораларга қўл уриши азалдан янгилик эмас. Аввалроқ тадбиркор Зафар Ҳошимов импорт оёқ кийимларига божнинг оширилиши контрабанданинг ривожланиши ва давлат бюджетига зарар етишига олиб келишини ёзган эди.
* * *
18 июнь куни халқ таълими вазири Шерзод Шерматов «Дарё»га берган эксклюзив интервьюсида мактаб формаси келаётган ўқув йилида мажбурий бўлмаслигини маълум қилди. Шундай қилиб, мактаб ўқувчилари учун мажбурий форма жорий қилиш 2024 йилгача кечиктирилди. Мактаб формаси жорий этилишига тарафдор ёки қарши томонларнинг асос-далиллари билан танишишни истасангиз, «Дарё» колумнисти Евгений Скляревскийнинг «Мактаб формаси – баҳс учун мавзу» мақоласини ўқиб чиқишингиз мумкин. Унда икки томоннинг ўз ҳақиқатлари атрофлича ёритилган.
* * *
Жуда кўп баҳсларга сабаб бўлган қурол олиб юришни тартибга солувчи қонунни сенаторлар маъқуллади. Қонунда қурол турлари таснифланган бўлиб, у фуқаровий қурол, хизмат қуроли ҳамда жанговар қуролдан иборат. Фуқаровий қурол ов қуроли, спорт қуроли ва ўзини ўзи ҳимоя қилиш қуролига бўлинади. Унда қуролни ва унинг ўқ-дориларини олиш ҳуқуқига эга бўлган субъектлар рўйхати белгиланган.
Ушбу қонунни кўплаб нашр ва блогерлар фуқаронинг қурол олиб юришига рухсат берилиши дея талқин қилди. Бироқ блогер Шаҳноза Тўрахўжаева ўз саҳифасида изоҳлашича, қонунда қуролга оид бетартиб муносабатлар тартибга солинди ва унда фуқарога ўқотар қурол сотилиши бўйича ҳеч гап йўқ. Айтиб ўтиш лозимки, Telegram’даги бир неча каналлар сўровномаси натижаларига кўра фуқароларга ўқотар қуролларга рухсат берилишига қаршилар сони 81–85 фоизни ташкил қилади (1, 2, 3)
* * *
Бу ҳафтада Ўзбекистон бош прокурори Отабек Муродов лавозимидан озод этилди. Шу куниёқ Олий Мажлис Сенати раиси Ниғматилла Йўлдошев Ўзбекистон бош прокурори этиб тайинланди.
Ниғматилла Йўлдошев асли юрист бўлиб, аввал бош прокурор ўринбосари бўлиб ишлаган.
2015 йилдан бери тўртинчи марта прокурор алмашди. Уларнинг барчаси порахўрлик айби билан ишдан олинган. Шу қаторда Отабек Муродовга ҳам жиноий иш очилди. Президент Шавкат Мирзиёев Сенат ялпи мажлисида чиқишида «у вилоят прокурорларидан 100 минг, туман прокурорларидан 50 минг доллардан пора олган», деб айтди.
* * *
Дайжестимизнинг бундан аввалги хабарида Сенат раиси бош прокурор этиб тайинланганини ёздик. Унинг бўшаб қолган ўрнига эса Хотин-қизлар қўмитаси раиси Танзила Норбоеванинг тайинланиши Ўзбекистон тарихида воқеа деб қайд этилди. Ўзбекистонда биринчи марта Сенатга аёл киши раислик қилади.
Танзила Норбоева андижонлик бўлиб, мутахассислиги педагог, фан номзоди унвони бор. Танзила Норбоеванинг ўрнини ҳозиргача соғлиқни сақлаш вазири ўринбосари бўлиб ишлаб келаётган Элмира Боситхонова эгаллади.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)