Surxondaryo viloyati Ekologiya va atrof-muhitni muhofaza qilish boshqarmasi inspektorlari Boysun tumanidagi Besh erkak massivida navbatdagi reyd tadbiri chog‘ida Temir darvoza mahallasida yashovchi B.Karimov, B.Jo‘raqulov hamda Chilonzor mahallasida yashovchi U.Daminovlarni noqonuniy xatti-harakatlar qilayotganida ushladi, bu haqda O‘zA xabar qiladi.
Ular noyob kavrak o‘simligi shirasini qonunga zid ravishda o‘zboshimchalik bilan yig‘ishtirib olayotgan edi. Bu kimsalarga nisbatan O‘zbekiston Respublikasi ma’muriy javobgarlik to‘g‘risidagi kodeksining 95-moddasiga muvofiq tegishli chora ko‘rildi.
Kavrak – shifobaxsh noyob o‘simlik. Undan olinadigan smola — yelim tarkibidagi efir moylari, unga sarimsoq hidini beruvchi organik sulfidlar, pinen, kumarin va boshqa moddalar tibbiyotda keng qo‘llaniladi. Qadimdan xalq tabobatida smola — yelimdan tomir tortishi, o‘pka sili, o‘lat, zahm, yo‘tal, tish og‘rig‘i, asab va boshqa kasalliklarni davolash uchun foydalanilgan. Balg‘am ko‘chiruvchi, quvvat beruvchi va gijja haydovchi vosita sifatida ham ishlatilgan.
Surxondaryo viloyatining tog‘ va tog‘oldi yalangliklari, cho‘l va adirlarida o‘sadigan bu o‘simlik zaxiralari o‘rganilib uni saqlab qolish va ko‘paytirish choralari belgilab olingan.
Mamlakatda so‘nggi yillarda ekologik nazoratga doir faoliyat samaradorligini oshirishga alohida e’tibor qaratilayotgani joylarda ekologik musaffolikni saqlash, tabiat in’om etgan boyliklarni asrab-avaylash va ulardan tejab, oqilona foydalanishga qulay muhit, keng imkoniyat yaratdi. Bu jarayonda kavrak o‘simligini yanada ko‘paytirib, keng maydonlarda plantatsiyalarini barpo etish, milliy iqtisodiyotni yuksaltirish va aholi salomatligini saqlashga yo‘naltirish yuzasidan ham tegishli vazifalar belgilab berildi.
“Prezidentning 2018-yil 20-martdagi “Respublikada kavrak plantatsiyalarini tashkil etish va ularning xomashyosini qayta ishlash hajmlarini ko‘paytirish hamda eksport qilish chora-tadbirlari to‘g‘risida“gi qarori bu borada muhim dasturilamal bo‘lmoqda. Shunga muvofiq boshqarmada tashkil etilgan davlat ekologik nazorati va profilaktika tadbirlarini o‘tkazish bo‘yicha doimiy faoliyat yurituvchi tezkor guruh kavrak o‘sadigan hududlarda nazoratni kuchaytirdi. Ular tomonidan joylarda o‘tkazilayotgan tezkor reydlar va o‘rganishlar chog‘ida tabiiy bu boylikka o‘zboshimchalik bilan zarar yetkazmoqchi bo‘lgan qonunbuzarlar aniqlanmoqda”, — deydi viloyat ekologiya va atrof-muhitni muhofaza qilish boshqarmasi jamoatchilik va ommaviy axborot vositalari bilan ishlash bo‘yicha yetakchi mutaxassis Murod Nurmatov.
Ma’lumotlarga ko‘ra, joriy yilning o‘tgan davrida tezkor guruhning davlat inspektorlari viloyatning Qumqo‘rg‘on, Sherobod, Muzrabot, Uzun va Boysun tumanlarida kavrak o‘simligining shirasiga tajovuz qilayotgan 70 ga yaqin shaxsni qo‘lga olib, qonun doirasida tegishli jazo qo‘lladi.
Viloyatda mazkur tadbir davom etmoqda.
Izoh (0)