Qashqadaryo viloyatidagi mavjud 135 ta kasb-hunar kollejining 49 072 nafar 3-bosqich o‘quvchisi “Korrupsiya – adolat kushandasi” mavzusida Respublika insholar tanlovida ishtirok etib, korrupsiya illati haqida fikr bildirdi. Bu haqda “Daryo” muxbiri ma’lum qilmoqda.
Insholar tanlovi doirasida o‘quvchi-yoshlarning korrupsiyaga qarshi kurash mazmunidagi “Eng yaxshi plakat”, “Eng yaxshi surat” nominatsiyalari bo‘yicha tayyorlagan ijodiy ishlari ham namoyish etildi.
Kasb-hunar ta’limi Qashqadaryo hududiy boshqarmasi boshlig‘i Kamol Norboyevga ko‘ra, mazkur insholar tanlovi Kasb-hunar ta’limi markazining 2019-yil 27-maydagi buyrug‘i asosida tashkil etilgan.
— Tanlovni o‘tkazishdan asosiy maqsad yoshlarning korrupsiyaga qarshi kurashish bo‘yicha bilimlarini yanada mustahkamlash, huquqiy savodxonligi va madaniyatini oshirish, yoshlarimizni davlat va jamiyat hayotining barcha sohalaridagi mavjud korrupsiyadan ogohlantirish, korrupsion huquqbuzarliklarni o‘z vaqtida aniqlash va bartaraf etish hamda korrupsion huquqbuzarliklar sodir etilgani uchun jazo muqarrar ekanligini chuqur anglatishdan iborat, — deydi kollejlar boshqarmasi boshlig‘i o‘rinbosari Umid Rahimov. — Shu ma’noda, kasb-hunar kollejlarini tamomlab, katta hayotga qadam qo‘yayotgan 3-bosqich o‘quvchilari ongu tafakkurida korrupsiyaga qarshi murosasiz kayfiyatni shakllantirish, ularning bu illatga qarshi mustahkam immunitetga ega bo‘lishi muhim ahamiyat kasb etadi.
Tanlov natijalariga ko‘ra, g‘oliblar Kasb-hunar ta’limi markazi va hududiy boshqarmalar, shuningdek, hamkor tashkilotlarning faxriy yorliq va sovg‘alari bilan taqdirlanadi.
Izoh (0)