Toshkentdagi Milliy matbuot markazida Uzbekistan Airways o‘tkazgan matbuot anjumanida ma’lum qilinishicha, 2018-yilda aviakompaniya 3 million 173 ming yo‘lovchiga xizmat ko‘rsatgan. Bu haqda O‘zA xabar bermoqda.
O‘tgan yildan bugungi kunga qadar 4 ta yangi – Mumbay (haftasiga 3 qatnov), Vladivostok (haftasiga 1 qatnov), Jidda (haftasiga 3 qatnov) va Jakarta (haftasiga 2 qatnov) yo‘nalishlari ochilgan.
O‘zbekiston Respublikasining bir qator huquqiy-normativ hujjatlari ijrosini ta’minlash maqsadida aviakompaniya tomonidan 2018-yilda chegirmalar taqdim etilgan. Jumladan, vaqtincha mehnat faoliyatini amalga oshirish uchun Rossiya Federatsiyasiga safarga chiqqan shaxslarga iqtisodiy klass minimal tarifidan 20 foiz miqdorida, Qoraqalpog‘iston Respublikasi va Xorazm viloyati aholisiga 50 foiz miqdorida. Shuningdek, chet ellik sayyohlar uchun xalqaro qatnovlarda tariflar 30 foizgacha pasaytirilgan.
Uzbekistan Airways vakillarining so‘zlariga ko‘ra, o‘tgan yilda mamlakatda aviayoqilg‘ining narxi oshganiga qaramasdan o‘rtacha tarif xalqaro yo‘nalishlar bo‘yicha 13 foizga, mahalliy yo‘nalishlarda esa 50 foizgacha pasaytirildi.
Izoh (0)