Қашқадарё вилоятидаги мавжуд 135 та касб-ҳунар коллежининг 49 072 нафар 3-босқич ўқувчиси «Коррупция – адолат кушандаси» мавзусида Республика иншолар танловида иштирок этиб, коррупция иллати ҳақида фикр билдирди. Бу ҳақда «Дарё» мухбири маълум қилмоқда.
Иншолар танлови доирасида ўқувчи-ёшларнинг коррупцияга қарши кураш мазмунидаги «Энг яхши плакат», «Энг яхши сурат» номинациялари бўйича тайёрлаган ижодий ишлари ҳам намойиш этилди.
Касб-ҳунар таълими Қашқадарё ҳудудий бошқармаси бошлиғи Камол Норбоевга кўра, мазкур иншолар танлови Касб-ҳунар таълими марказининг 2019 йил 27 майдаги буйруғи асосида ташкил этилган.
— Танловни ўтказишдан асосий мақсад ёшларнинг коррупцияга қарши курашиш бўйича билимларини янада мустаҳкамлаш, ҳуқуқий саводхонлиги ва маданиятини ошириш, ёшларимизни давлат ва жамият ҳаётининг барча соҳаларидаги мавжуд коррупциядан огоҳлантириш, коррупцион ҳуқуқбузарликларни ўз вақтида аниқлаш ва бартараф этиш ҳамда коррупцион ҳуқуқбузарликлар содир этилгани учун жазо муқаррар эканлигини чуқур англатишдан иборат, — дейди коллежлар бошқармаси бошлиғи ўринбосари Умид Раҳимов. — Шу маънода, касб-ҳунар коллежларини тамомлаб, катта ҳаётга қадам қўяётган 3-босқич ўқувчилари онгу тафаккурида коррупцияга қарши муросасиз кайфиятни шакллантириш, уларнинг бу иллатга қарши мустаҳкам иммунитетга эга бўлиши муҳим аҳамият касб этади.
Танлов натижаларига кўра, ғолиблар Касб-ҳунар таълими маркази ва ҳудудий бошқармалар, шунингдек, ҳамкор ташкилотларнинг фахрий ёрлиқ ва совғалари билан тақдирланади.
Изоҳ (0)