Fransiyaning Biarrits shahri meri o‘rinbosari Joselin Kastaned Rossiya prezidenti Vladimir Putining oilasi munitsipalitetda ikki uyga egalik qilishini tasdiqladi. Bu haqda “Znak” xabar bermoqda.
Uylardan biri Putinning kuyovi ekanligi aytilayotgan Kirill Shamalovga tegishli. U uyni 2012-yilda turmush o‘rtog‘i, “Innopraktika” tashkiloti bosh direktori Katerina Tixonova uchun xarid qilgan.
“Odamlar ularni bozorda aylanib yurganini ko‘radi. Ammo biz ularga yaqinlashmaymiz va selfi qilmaymiz. Ular kim ekanligi bizni qiziqtirmaydi”, — dedi Kastaned.
Joselinning aytishicha, uy qonuniy asosda xarid qilingan. Biarritsga Putinning sobiq rafiqasi Lyudmila Putina ham muntazam kelib turadi.
4 qavatli uy dengiz qirg‘og‘ida joylashgan. Uning maydoni 300 kvadrat metr, umumiy yer maydoni esa taxminan 2000 kvadrat metrdan iborat. Bino 1950-yillarda qurilgan. Uni 7 yil avval ta’mirlagan me’mor Per Forroga ko‘ra, uyning narxi 3,5 million yevrodan oshiq.
Izoh (0)