12-iyun kuni Daryo — Live kanalida “Bu — Qashqadaryo viloyati Nishon tumani markaziy shifoxonasining tug‘uruqqacha bo‘lgan davolanish bo‘limi” sarlavhasi ostida suratlar e’lon qilingandi. Unda “Daryo” mushtariysiga tayanib, Nishon tumani markaziy shifoxonasining tug‘ruqqacha bo‘lgan davolanish bo‘limida ayollar koridorda yotgani, bitta palataga 8—9 nafardan ayol joylashtirilgani yozilgandi.
Shundan so‘ng, Sog‘liqni saqlash vazirligi ham bu haqda bayonot berdi. Bayonotda aytilishicha, barchasi risoladagidek, muammo yo‘q. Emishki, Nishon tumani markaziy shifoxonasining homiladorlar patologiyasi va ginekologiya bo‘limlarida yo‘lakda yotib davolanayotgan bemorlar aniqlanmagan. Bemorlar o‘rinlariga joylashuviga qadar o‘zlari va qarindoshlari yerga joy to‘shab yotib olgan.
Ammo “Daryo” muxbirining ko‘rgan-kechirganlari Nishondagi markaziy shifoxonada vaziyat boshqacha ekanligidan darak beradi.
— Haqiqatdan ham o‘sha kuni og‘ir ahvolda bo‘limga keldim, — deydi ijtimoiy tarmoqda tarqalgan suratda “nosilka”da yotgani tasvirlangan Gulnoza Qodirova. – Baraka topishsin, do‘xtirlar tezda yordam ko‘rsatishdi. Bolamni asrab qolishdi. Ahvolim yomonligi bois, palatalarda joy bo‘lmasa ham, koridorda bo‘lsa-da, yotib davolanishimni aytdim. Bu yerda shifokorlarning zarracha aybi yo‘q. Hamma gap sharoitda. Avval shart-sharoitni to‘g‘rilab qo‘yish kerak.
— Men kelgan paytimda ham joy tanqis ekan, joy yo‘q deyishdi, — deydi bemor Zohida Ergasheva. – Shunday bo‘lsa-da, koridorda kutib turdim. Ikki soat o‘tgach, joy bo‘shadi. Palataga joylashdim. Hozir davolanyapman.
Ma’lum bo‘lishicha, har ikkala bemor ham 10-iyun kuni, biri qon ketish, ikkinchisi suv ketishi tashxisi bilan bo‘limga murojaat qilgan. Palatalarda joy yo‘qligi bois, koridorda kutishga majbur bo‘lgan.
Nishon tuman tibbiyot birlashmasi bosh shifokori o‘rinbosarining aytishicha, ijtimoiy tarmoqlarda tarqalgan surat, tug‘uruq bo‘limidan emas, patologiya bo‘limida olingan.
— 2017-yil yonimizdagi bino talabga javob bermay qolgani bois, uning ikkinchi qavatida joylashgan tug‘uruq bo‘limi, patologiya va ginekologiya bo‘limlari joylashgan ushbu binoga kelib joylashdi, — deydi bosh shifokor o‘rinbosari Muyasssar Halilova. – Ayni paytda tug‘uruq bo‘limi binoning ikkinchi qavatida joylashgan. Surat olingan joy esa patologiya bo‘limi koridori hisoblanadi. Bemorlarni joylashtirish bilan bog‘liq muammoimiz bor albatta, ammo patologiya bo‘limidan olingan suratni “bu tug‘uruq bo‘limi, bu yerda nafaqat onalar, bolalar ham yotadi”, deya yolg‘on gapirish insofdan bo‘lmas.
— O‘sha kuni issiqdan qiynalib ketganim uchun palatamdan chiqib, koridorda joy qilib yotdim, — deydi yana bir bemor Jonguloy Eshbo‘riyeva. – Palatalarning haddan ortiq issiq va dimligiga chiday olmayman-da.
Tibbiyot birlashmasining tug‘uruq bo‘limi boshlig‘i vazifasini vaqtincha bajaruvchi (ayni damda o‘sha voqea sabab ishdan bo‘shatilgan) Nargiza Sazanbayevaning ma’lumot berishicha, bo‘lim patologiya va ginekologiyani qo‘shib hisoblaganda 90 o‘rinli. Ammo bo‘limda ayni kunda 101 nafar bemor yotib davolanmoqda.
Jurnalistik kuzatuvlarimizga ko‘ra, o‘sha kuni biz bilan suhbatlashgan Gulnoza Qodirova hali ham palatada ortiqcha, 5-bemor bo‘lib zambilda yotib davolanmoqda.
Nargiza Sazanbayevaning qo‘shimcha qilishicha, bo‘limda bemorlar ko‘payib ketishiga viloyat perinatal markazining ta’mirlanayotgani ham sabab bo‘lmoqda.
— Har oy ahvoli eng og‘ir bemorlarimizning 15–20 nafari viloyat perinatal markaziga yo‘llanma olardi, — deydi Nargiza Sazanbayeva. – Shaxsan o‘zim oyiga 22 nafargacha bemorni olib borganman. 1-iyundan u yerda ta’mirlash ishlari ketayotgani bois, ayni damda bizning bemorlarimiz soni ortib ketdi.
Tuman tibbiyot birlashmasi bosh shifokori Yoqub Shonazarovning aytishicha, 170 o‘rinli 5 qavatli bino 1985-yil foydalanishga topshirilganicha, haligacha ta’mirlanmagan. E’tibordan chetda qolgan. Shu boisdan ham 2017-yil binoni tark etishgan. Jumladan binoning 2-qavatida joylashgan tug‘uruq bo‘limi ham. 5 qavatli bino mana ikki yildirki huvillab yotibdi. Ta’mirga muhtoj.
— Aytishlaricha, investitsiya dasturiga ko‘ra, 2020-yil ta’mirlab berishar ekan, — deydi bosh shifokor. – Kutyapmiz.
Gapning indallosini aytganda, bo‘limda muammo yo‘q emas. Bor. Bemorlar uchun joy muammo. Haqiqatdan ham og‘ir ahvolda kelgan bemorlar joy yetishmasligi bois, u xoh patologiya, xoh tug‘uruq bo‘limi koridori bo‘lsin, o‘sha yerdan vaqtincha qo‘nim topayotgani afsuski, bor gap. Agar bu muammoga vaqtida yechim topilmasa, hali ko‘plab bemorlar bu koridorlarda yotishi aniq.
Yanayam yomoni, bu faqatgina kechagi gap emas ekan. 2014-yil shu yerda farzandini bag‘riga bosgan onaning guvohlik berishicha, bu holat 2014-yil ham bo‘lgan. O‘sha yili ham xuddi shunday koridorda yotganlar bisyor bo‘lgani aytilmoqda. Ammo shu gaplarni aytganlarning hech biri bo‘lim shifokorlaridan nolimadi. “Baraka topishsin, qo‘llari yengil”, — deyishdi. “Muammo faqat bino va yaratilgan sharoitda”, — deya bot-bot takrorlashdi ham.
O‘zbekiston shifoxonalarida joy yetishmasligi yoki yomon sharoit tufayli bemorlar palatadan tashqarida yotishga majbur bo‘lishi oldin ham kuzatilgan. “Daryo”da 2019-yil bahorida joy yetishmasligi sabab Navoiy viloyatidagi perinatal markazda ayollar polga yotqizilayotgani, 2017-yil yozida Toshkent viloyati Zangiota tumanidagi yuqumli kasalliklar shifoxonasining bemor bolalari tomda yotishga majbur bo‘lgani haqida materiallar chop etilgandi.
Izoh (0)