13-iyun kuni O‘zbekiston Respublikasi Oliy Majlis Qonunchilik palatasi deputatlari ishtirokida OAV vakillari bilan ochiq muloqot bo‘lib o‘tdi.
Unda Senat tomonidan 2019-yil 28-fevralda ma’qullangan, Prezident tomonidan 2019-yil 10-mayda imzolangan “Ba’zi davlat organlari va tashkilotlarining faoliyati takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun yuzasidan ma’lumot berildi.
“Daryo” muxbiri Musulmonbek Ibrohimov propiska olish tartibi, fuqarolarga ikki xil narxda boj belgilangani, agar fuqaro doimiy propiskaga ega bo‘lmasa, ikkilamchi bozorda turar joy sotib ololmasligi va bu holatlar Konstitutsiyaga qanchalik mos ekani haqida savol berdi.
“Shaxsiy fikrimni bildiradigan bo‘lsam, bu noto‘g‘ri, — dedi deputat Ibrohim Hojiyev. — Shaxsan o‘zimga va boshqa ko‘p deputatlarga ham aynan shu masalada juda ko‘p murojaatlar kelib tushadi. Sizni ishontirib aytaman, bu masala ham tartibga solinadi. Shu muammo yuzasidan ish olib borayotgan ishchi guruh tarkibida deputatlar ham bor. Bu masala shunday qolmaydi, o‘zgarish bo‘ladi. Albatta bu vaqt talab qiladi, lekin uzoq kutmaysizlar. Bosqichma-bosqich tartibga solinadi. Bu bo‘yicha belgilangan topshiriqlar bo‘lgan”.
Shuningdek, “Daryo” muxbiri “Regulation.gov.uz” sayti orqali jamoatchilik muhokamasiga qo‘yilayotgan qonun hujjatlari loyihalarining aksariyati nega rus tilida ekani, davlat tilidagi varianti yo‘qligi, nega deputatlar shunga munosabat bildirmayotgani, tashabbus ko‘rsatmayotgani xususida so‘radi.
“Do‘stimizning e’tirozlari to‘g‘ri. Ayrim sohalardagi muammolarga vaqt topmayapmiz, — dedi deputat Islom Xushvaqtov. — Jurnalistlar bilan tez-tez uchrashib, ko‘proq muloqot qilishimiz, takliflar olib turishimiz kerak. Bu e’tirozlarni yozib oldik, buni tegishli qo‘mita raisi va spikerga yetkazamiz”.
Izoh (0)