Нишон марказий шифохонасида муаммо бор: ҳал этилмаса ҳали кўп беморлар коридорда ётади

12 июнь куни Daryo — Live каналида «Бу — Қашқадарё вилояти Нишон тумани марказий шифохонасининг туғуруққача бўлган даволаниш бўлими» сарлавҳаси остида суратлар эълон қилинганди. Унда «Дарё» муштарийсига таяниб, Нишон тумани марказий шифохонасининг туғруққача бўлган даволаниш бўлимида аёллар коридорда ётгани, битта палатага 8—9 нафардан аёл жойлаштирилгани ёзилганди.

Шундан сўнг, Соғлиқни сақлаш вазирлиги ҳам бу ҳақда баёнот берди. Баёнотда айтилишича, барчаси рисоладагидек, муаммо йўқ. Эмишки, Нишон тумани марказий шифохонасининг ҳомиладорлар патологияси ва гинекология бўлимларида йўлакда ётиб даволанаётган беморлар аниқланмаган. Беморлар ўринларига жойлашувига қадар ўзлари ва қариндошлари ерга жой тўшаб ётиб олган.

Аммо «Дарё» мухбирининг кўрган-кечирганлари Нишондаги марказий шифохонада вазият бошқача эканлигидан дарак беради.

— Ҳақиқатдан ҳам ўша куни оғир аҳволда бўлимга келдим, — дейди ижтимоий тармоқда тарқалган суратда «носилка»да ётгани тасвирланган Гулноза Қодирова. – Барака топишсин, дўхтирлар тезда ёрдам кўрсатишди. Боламни асраб қолишди. Аҳволим ёмонлиги боис, палаталарда жой бўлмаса ҳам, коридорда бўлса-да, ётиб даволанишимни айтдим. Бу ерда шифокорларнинг заррача айби йўқ. Ҳамма гап шароитда. Аввал шарт-шароитни тўғрилаб қўйиш керак.

— Мен келган пайтимда ҳам жой танқис экан, жой йўқ дейишди, — дейди бемор Зоҳида Эргашева. – Шундай бўлса-да, коридорда кутиб турдим. Икки соат ўтгач, жой бўшади. Палатага жойлашдим. Ҳозир даволаняпман.

Маълум бўлишича, ҳар иккала бемор ҳам 10 июнь куни, бири қон кетиш, иккинчиси сув кетиши ташхиси билан бўлимга мурожаат қилган. Палаталарда жой йўқлиги боис, коридорда кутишга мажбур бўлган.

Нишон туман тиббиёт бирлашмаси бош шифокори ўринбосарининг айтишича, ижтимоий тармоқларда тарқалган сурат, туғуруқ бўлимидан эмас, патология бўлимида олинган.

— 2017 йил ёнимиздаги бино талабга жавоб бермай қолгани боис, унинг иккинчи қаватида жойлашган туғуруқ бўлими, патология ва гинекология бўлимлари жойлашган ушбу бинога келиб жойлашди, — дейди бош шифокор ўринбосари Муясссар Ҳалилова. – Айни пайтда туғуруқ бўлими бинонинг иккинчи қаватида жойлашган. Сурат олинган жой эса патология бўлими коридори ҳисобланади. Беморларни жойлаштириш билан боғлиқ муаммоимиз бор албатта, аммо патология бўлимидан олинган суратни «бу туғуруқ бўлими, бу ерда нафақат оналар, болалар ҳам ётади», дея ёлғон гапириш инсофдан бўлмас.

— Ўша куни иссиқдан қийналиб кетганим учун палатамдан чиқиб, коридорда жой қилиб ётдим, — дейди яна бир бемор Жонгулой Эшбўриева. – Палаталарнинг ҳаддан ортиқ иссиқ ва димлигига чидай олмайман-да.

Тиббиёт бирлашмасининг туғуруқ бўлими бошлиғи вазифасини вақтинча бажарувчи (айни дамда ўша воқеа сабаб ишдан бўшатилган) Наргиза Сазанбаеванинг маълумот беришича, бўлим патология ва гинекологияни қўшиб ҳисоблаганда 90 ўринли. Аммо бўлимда айни кунда 101 нафар бемор ётиб даволанмоқда.

Журналистик кузатувларимизга кўра, ўша куни биз билан суҳбатлашган Гулноза Қодирова ҳали ҳам палатада ортиқча, 5-бемор бўлиб замбилда ётиб даволанмоқда.

Наргиза Сазанбаеванинг қўшимча қилишича, бўлимда беморлар кўпайиб кетишига вилоят перинатал марказининг таъмирланаётгани ҳам сабаб бўлмоқда.

— Ҳар ой аҳволи энг оғир беморларимизнинг 15–20 нафари вилоят перинатал марказига йўлланма оларди, — дейди Наргиза Сазанбаева. – Шахсан ўзим ойига 22 нафаргача беморни олиб борганман. 1 июндан у ерда таъмирлаш ишлари кетаётгани боис, айни дамда бизнинг беморларимиз сони ортиб кетди.

Туман тиббиёт бирлашмаси бош шифокори Ёқуб Шоназаровнинг айтишича, 170 ўринли 5 қаватли бино 1985 йил фойдаланишга топширилганича, ҳалигача таъмирланмаган. Эътибордан четда қолган. Шу боисдан ҳам 2017 йил бинони тарк этишган. Жумладан бинонинг 2-қаватида жойлашган туғуруқ бўлими ҳам. 5 қаватли бино мана икки йилдирки ҳувиллаб ётибди. Таъмирга муҳтож.

— Айтишларича, инвестиция дастурига кўра, 2020 йил таъмирлаб беришар экан, — дейди бош шифокор. – Кутяпмиз.

Гапнинг индаллосини айтганда, бўлимда муаммо йўқ эмас. Бор. Беморлар учун жой муаммо. Ҳақиқатдан ҳам оғир аҳволда келган беморлар жой етишмаслиги боис, у хоҳ патология, хоҳ туғуруқ бўлими коридори бўлсин, ўша ердан вақтинча қўним топаётгани афсуски, бор гап. Агар бу муаммога вақтида ечим топилмаса, ҳали кўплаб беморлар бу коридорларда ётиши аниқ.

Янаям ёмони, бу фақатгина кечаги гап эмас экан. 2014 йил шу ерда фарзандини бағрига босган онанинг гувоҳлик беришича, бу ҳолат 2014 йил ҳам бўлган. Ўша йили ҳам худди шундай коридорда ётганлар бисёр бўлгани айтилмоқда. Аммо шу гапларни айтганларнинг ҳеч бири бўлим шифокорларидан нолимади. «Барака топишсин, қўллари енгил», — дейишди. «Муаммо фақат бино ва яратилган шароитда», — дея бот-бот такрорлашди ҳам.