Samarqand shahrida Xalqaro press klub tomonidan “O‘zbekistonda oliy ta’lim tizimi: islohotlarning yangi bosqichi, muammolarning chuqur tahlili va tezkor yechimlar” mavzusida sayyor sessiya o‘tkazildi. Bu haqda Zarnews xabar bermoqda.
Unda tarixiy obidalar yonida soxta gidlarning ko‘payayotgani, ular tomonidan turizm salohiyatiga mos kelmaydigan kiyimlarda sayyohlarga noto‘g‘ri ma’lumot berilayotgani haqida “Ipak yo‘li” turizm xalqaro universiteti prorektori Bahodir To‘rayev quyidagi fikrlarni bildirdi.
— SamDU qoshida turizm va real sektor iqtisodiyotida kadrlar malakasini oshirish va qayta tayyorlash Samarqand viloyati markazi ochilgandi. Mana shu markazda Turizmni rivojlantirish qo‘mitasi tomondan franshiza olingan. Gid-tarjimonlik faoliyati bo‘yicha besh oylik kurslar ochilgan. Soxta gidlar muammosi vokzaldan tushayotgan turistlar oldidan boshlanadi. “Afrosiyob” poyezdidan tushayotgan turistga na litsenziya, na yetarli ma’lumotga ega taksi haydovchisi ham, mehmonxona xodimi ham o‘z xizmatini taklif etadi.
Viloyat Jamoatchilik kengashida turizm masalalari bo‘yicha o‘tgan yig‘ilishda aynan shu masalalarni ko‘rib, qaror ham chiqargandik. Samarqandda shu maqsadda xavfsiz turizm politsiyasi tashkil etilgan. Universitetimizda ham bu yildan gid-tarjimonlik bo‘yicha o‘quv ishlarini boshladik. Amerika hamda Yevropa standartlariga ko‘ra, 3 yilda talabalarni tayyorlaydi. Hozirdan bunga amaliy chora ko‘rilmasa, bu bora-bora O‘zbekiston imijiga salbiy ta’sir etadi.
Izoh (0)