Qarzdor Jarqo‘rg‘on tuman hokimligi Kassatsiya sudiga ariza berganligi sababli Ijro ishi vaqtinchalik to‘xtatilgan. Bu haqda Majburiy ijro byurosi matbuot xizmati “Daryo”ga ma’lum qildi.
Ma’lum qilinishicha, fuqarolik ishlari bo‘yicha Qumqo‘rg‘on tumanlararo sudining 2019-yil 21-yanvardagi ijro varaqasiga asosan Abdurazzoq Qoraqulov foydasiga yer uchastkasining olib qo‘yilishi munosabati bilan yetkazilgan 27 843 191 so‘m moddiy zarar undirish haqidagi ijro hujjati mavjud.
Olib borilgan ijro harakatlari davomida 27-mart 2019-yilda qarzdor Jarqo‘rg‘on tuman hokimligiga tegishli 2 dona (30 litr hajmli) suv isitish moslamasi va monoblok-kompyuteri to‘plami xolislar ishtirokida xatlanib, 3 750 000 so‘mga baholangan. Shuningdek, 5-aprel 2019-yilda qarzdor Jarqo‘rg‘on tuman hokimligiga tegishli Nexia-3 rusumli, davlat raqam belgisi 75 246 SAA bo‘lgan avtotransport vositasi xolislar ishtirokida xatlanib, vaqtincha saqlash uchun tuman hokimligiga topshirilgan.
Hozirda ushbu ijro hujjati fuqarolik ishlari bo‘yicha Qumqo‘rg‘on tumanlararo sudining 2019-yil 8-apreldagi ajrimga asosan kassatsiya instantsiyasida ko‘rilgunga qadar to‘xtatilgan.
Avvalroq “Daryo” da “Jarqo‘rg‘on tuman hokimligi tadbirkorlar do‘konini buzib, mulkdorlarga yetkazilgan zararni qoplamayapti” nomli murojaat chop etilgan edi.
Murojaatda Surxondaryo viloyati Jarqo‘rg‘on tumani “Bobur” mahallasida yashovchi Abdurazzoq Karakulovning savdo qilib turgan Kakaydi qo‘rg‘oni markazida joylashgan tijorat do‘koni zo‘rovonlik bilan noqonuniy ravishda buzalgani bois, Jarqo‘rg‘on hokimligidan yetkazilgan zarar uchun 27 mln 843 ming so‘m miqdorida kompensatsiya puli undirilishi sud tomonidan belgilanganligi, Majburiy ijro byurosi ham pullarini hokimdan undirib berolmayotganligini ta’kidlangan edi.
Izoh (0)