Қарздор Жарқўрғон туман ҳокимлиги Кассация судига ариза берганлиги сабабли Ижро иши вақтинчалик тўхтатилган. Бу ҳақда Мажбурий ижро бюроси матбуот хизмати «Дарё»га маълум қилди.
Маълум қилинишича, фуқаролик ишлари бўйича Қумқўрғон туманлараро судининг 2019 йил 21 январдаги ижро варақасига асосан Абдураззоқ Қорақулов фойдасига ер участкасининг олиб қўйилиши муносабати билан етказилган 27 843 191 сўм моддий зарар ундириш ҳақидаги ижро ҳужжати мавжуд.
Олиб борилган ижро ҳаракатлари давомида 27 март 2019 йилда қарздор Жарқўрғон туман ҳокимлигига тегишли 2 дона (30 литр ҳажмли) сув иситиш мосламаси ва моноблок-компьютери тўплами холислар иштирокида хатланиб, 3 750 000 сўмга баҳоланган. Шунингдек, 5 апрель 2019 йилда қарздор Жарқўрғон туман ҳокимлигига тегишли Nexia-3 русумли, давлат рақам белгиси 75 246 САА бўлган автотранспорт воситаси холислар иштирокида хатланиб, вақтинча сақлаш учун туман ҳокимлигига топширилган.
Ҳозирда ушбу ижро ҳужжати фуқаролик ишлари бўйича Қумқўрғон туманлараро судининг 2019 йил 8 апрелдаги ажримга асосан кассация инстанциясида кўрилгунга қадар тўхтатилган.
Аввалроқ «Дарё» да «Жарқўрғон туман ҳокимлиги тадбиркорлар дўконини бузиб, мулкдорларга етказилган зарарни қопламаяпти» номли мурожаат чоп этилган эди.
Мурожаатда Сурхондарё вилояти Жарқўрғон тумани «Бобур» маҳалласида яшовчи Абдураззоқ Каракуловнинг савдо қилиб турган Какайди қўрғони марказида жойлашган тижорат дўкони зўровонлик билан ноқонуний равишда бузалгани боис, Жарқўрғон ҳокимлигидан етказилган зарар учун 27 млн 843 минг сўм миқдорида компенсация пули ундирилиши суд томонидан белгиланганлиги, Мажбурий ижро бюроси ҳам пулларини ҳокимдан ундириб беролмаётганлигини таъкидланган эди.
Изоҳ (0)