22-aprelning e’tiborga molik yangiliklari — “Daryo” dayjestida.
Nega bu yil aprel oyi seryomg‘ir bo‘ldi? “O‘zgidromet” markazi javob berdi.
Deyarli butun oy davomida O‘zbekiston hududi ustida janubda hosil bo‘lgan nam havo oqimlari Rossiyaning Yevropa hududidan kirib kelgan va u nisbatan sovuq havo oqimlari bilan doimiy ravishda qo‘shilib turdi. Havo oqimlarining bunday bir-biriga qo‘shilishi esa kuchli jala hosil bo‘lishi uchun qulay sharoit yaratar ekan.
***
Buxorodagi metan gaz quyish shoxobchasida Nexia portlab ketdi.
Bosh prokuratura ma’lum qilishicha, Qiziltepa tumani, “Bo‘lakrabot” mahallasi hududida joylashgan “Qiziltepa Zarafshon alangasi” MChJga tegishli metan gaz qo‘yish shoxobchasida metan gaz quyishi vaqtida, avtomashinaga o‘rnatilgan gaz balloni bosim natijasida to‘satdan chaqnashi natijasida 2 qismga bo‘linib ketgan.
***
Nilufar Usmonova 5 yil avval ismini o‘zgartirganini ma’lum qildi.
“Assalomu alaykum, men bu siz bilgan Nilufar Usmonova, ammo 5 yildan buyon men Aishaman.
Avvalambor, Alhamdulillah, muslimaman. Bilasizmi men ismimning ham muslimalarga xos bo‘lishini juda ham xohlardim. Qolaversa, bu ism menga judayam yoqib qolgan. Men ism egasi Aisha onamizga havas qilib, azon ayttirib bu ismni qo‘ydim”, — deb yozdi xonanda Instagram’da.
***
Poroshenko Ukraina prezidenti saylovidagi mag‘lubiyatini tan oldi.
Poroshenko Vladimir Zelenskiyga qo‘ng‘iroq qilgan va uni g‘alaba bilan tabriklagan. Ekzit-pol natijalariga ko‘ra, Zelenskiy saylovchilarning 73,2, Poroshenko esa 25,3 foiz ovozini to‘plagan.
***
O‘zbekistonda erkaklar va ayollar uchun nikoh yoshi tenglashtiriladi.
Bola huquqlari kafolatlarini yanada kuchaytirishga oid qo‘shimcha chora-tadbirlar to‘g‘risidagi Prezident qarori qabul qilindi. Unga muvofiq, 2019-yil 1-sentabrdan erkaklar va ayollar uchun nikoh yoshi o‘n sakkiz yosh etib belgilandi.
Izoh (0)