Tojikiston Milliy banki raisining birinchi o‘rinbosari J.Nuraliyev Jahon banki (JB) katta iqtisodchisi Goar Gyuluman va JBning Tojikistondagi vakolatxonasi boshlig‘i Yan Piter Olters bilan uchrashuvda ana shunday iltimos bilan chiqdi. Bu haqda bank matbuot xizmatining ma’lumotiga tayanib “Xalq so‘zi” xabar berdi.
J.Nuraliyev muloqot davomida Rog‘un GESi “mintaqa davlatlarini arzon elektr energiyasi bilan ta’minlash yo‘lida” muhim mintaqaviy ahamiyatga ega ekanligini ta’kidlagan. U Jahon banki vakillariga Rog‘un gidrouzeli qurilishi loyihasini amalga oshirishni davom ettirish uchun xorijiy investitsiyalarni jalb qilishga ko‘mak berishini so‘rab murojaat qilgan.
Hozirgacha, Tojikiston ushbu gidroelektr stansiyasini o‘z mablag‘lari hisobiga bunyod etyapti. Mamlakat moliya vazirligi ma’lumotiga ko‘ra, mazkur maqsadlar yo‘lida 2019-yilda mamlakat budjetidan 2 milliard 100 million somoni (222 million AQSh dollari) yo‘naltirilgan. O‘tgan yilda esa buning uchun 4,7 milliard somoni sarflangan bo‘lsa, shundan 3,4 milliard somonisi budjet mablag‘lari, qolgani Tojikistonga ajratilgan yevrobondlar hisobidan qoplangan.
Eslatib o‘tamiz, 2017-yil sentabr oyida Tojikiston okean ortidagi jahon bozorida 500 million AQSh dollariga teng davlat qimmatbaho qog‘ozlarining birinchi partiyasini muvaffaqiyatli sotgan edi. O‘shanda obligatsiyalarning foyda foizi yiliga 7,125 foizni tashkil etgan. Mamlakat ichkarisida sotilgan Rog‘un GESi aksiyalaridan 980 million somoni miqdorida mablag‘ kelib tushgan. Ularning katta qismi gidroelektr stansiyasi uchun asbob-uskunalar sotib olish uchun ishlatildi.
Ma’lumot uchun, Rog‘un GESi 6 agregatdan iborat bo‘ladi. U foydalanishga topshirilganidan so‘ng bir yilda 17 milliard kVt. energiya ishlab chiqariladi. Mamlakat rasmiylarining fikricha, bu nafaqat Tojikistonni arzon elektr energiyasi bilan ta’minlashga, balki qo‘shni Afg‘oniston va Pokistonga ham elektr energiyasi eksport qilishga imkon beradi.
Jahon bankining Tojikistondagi vakolatxonasi rahbari Yan Piter Olters o‘z navbatida JB Rog‘un GESi qurilishi loyihasini qo‘llab quvvatladi, chunki bu mamlakatdagi ijtimoiy-iqtisodiy muammolarni hal qilishga yordam berishini bildirgan.
“Ushbu masalani hal qilishda mazkur loyiha keltirib chiqarishi mumkin bo‘lgan moliyaviy xatarlarini bartaraf etish uchun mamlakat iqtisodiy modelini modernizatsiya qilish yo‘llarini strategik muhokama qilishni tashkil etish, xususiy sektor faoliyati, energetika va boshqa tarmoqlarda yangi texnologiya va usullardan foydalanishni rag‘batlantirish lozim”, — deb ta‘kidladi Yan Piter Olters.
Izoh (0)