“Daryo” tahririyatiga Buxoro shahrida yashovchi hamda to‘rt yildan beri kasallik tufayli yurolmay qolgan ikki farzandning onasi Dildora Xasanova murojaat qildi. Dildora opaning aytishicha, bundan to‘rt yil muqaddam u ham boshqalar qatori baxtli oila bekasi sifatida yashayotgan, turmush tashvishlari bilan band edi.
Kutilmaganda hamma xavas qiladigan baxtli oila taqdirning sinovlariga duchor bo‘ldi. Dildora opa kasallikka chalindi.
“2015-yil menda umurtqa pog‘onasi ko‘krak sohasida 2,5 santimetrli o‘sma borligi aniqlandi. Shu o‘smani oldirib tashlaganimdan keyin oyoqlarim ishlamay qoldi.
O‘sma o‘smaydigan ekan, lekin nerv tolalarini siqib qo‘ygan ekan. O‘smani olish paytida nervlar ham kesilgan. Hozirgacha nerv tolalarining 10 foizi tiklangan, harakat ko‘p bo‘lsa 100 foiz tiklanar ekan.
Shundan beri har oy davolovchi massajlar olib kelaman, yozib berilgan dorilarni qabul qilaman.
Hozirgacha turmush o‘rtog‘im ham ovqatim, ham kirim, ustimga bolalarimga bir o‘zi qaraydi. Bizni hech kimga ishonmaydi. Yaqinda u kishining ham qon bosimi ko‘tarilib kar bo‘lib qoldi.
Shu to‘rt yil davomida viloyatga chet eldan kelgan shifokorlarning hammasiga ko‘rindim. Ular operatsiya noto‘g‘ri qilingan, bir umrga o‘zgarish bo‘lmaydi, degan edi. Lekin oilamiz bilan ortga chekinmay, yurish uchun qo‘ldan kelgancha harakat qilyapmiz. Yaqinda Hindistondan kelgan shifokorlarga ko‘ringanimda ular ijobiy o‘zgarish borligi, xorijiy davlatlarda reabilitatsiya qilinsa undan ham yaxshi natija bo‘lishini aytib, bizga umid bag‘ishladi”, — deydi Dildora opa.
Hindistondagi jarrohlik amaliyoti uchun 5000 dollar talab qilinadi.
“Operatsiyadan so‘ng sog‘lom odamday yurolmayman. Xodulkada yurishim, hojatga o‘zim mustaqil chiqishim mumkin ekan. Men shunisiga ham roziman. Chunki oyoqda yurgan odam yurolmay qolsa, judayam alam qilarkan. Mening kasalimda qancha ko‘p yurmasa, shuncha yurish degan fikr miyadan ucharkan. Bolalarim baxtiga, oilam baxtiga o‘rnimdan tursam, deyman”, — deya so‘zlarini davom ettiradi Dildora opa.
Aziz yurtdoshlar, Dildora Xasanovaga qo‘ldan kelgunicha yordam beraylik! Bir mushtipar ayolning oyoqqa turib ketishiga sababchi bo‘laylik!
Xayriya qilish uchun:
Dildora Xasanovaning telefon raqami: 90 710 32 13
Plastik karta raqami: 8600 0609 8874 2566
Visa kartasi raqami: 4231 2000 0067 8093 KHASANOVA DILDORA
Izoh (0)