«Дарё» таҳририятига Бухоро шаҳрида яшовчи ҳамда тўрт йилдан бери касаллик туфайли юролмай қолган икки фарзанднинг онаси Дилдора Хасанова мурожаат қилди. Дилдора опанинг айтишича, бундан тўрт йил муқаддам у ҳам бошқалар қатори бахтли оила бекаси сифатида яшаётган, турмуш ташвишлари билан банд эди.
Кутилмаганда ҳамма хавас қиладиган бахтли оила тақдирнинг синовларига дучор бўлди. Дилдора опа касалликка чалинди.
«2015 йил менда умуртқа поғонаси кўкрак соҳасида 2,5 сантиметрли ўсма борлиги аниқланди. Шу ўсмани олдириб ташлаганимдан кейин оёқларим ишламай қолди.
Ўсма ўсмайдиган экан, лекин нерв толаларини сиқиб қўйган экан. Ўсмани олиш пайтида нервлар ҳам кесилган. Ҳозиргача нерв толаларининг 10 фоизи тикланган, ҳаракат кўп бўлса 100 фоиз тикланар экан.
Шундан бери ҳар ой даволовчи массажлар олиб келаман, ёзиб берилган дориларни қабул қиламан.
Ҳозиргача турмуш ўртоғим ҳам овқатим, ҳам кирим, устимга болаларимга бир ўзи қарайди. Бизни ҳеч кимга ишонмайди. Яқинда у кишининг ҳам қон босими кўтарилиб кар бўлиб қолди.
Шу тўрт йил давомида вилоятга чет элдан келган шифокорларнинг ҳаммасига кўриндим. Улар операция нотўғри қилинган, бир умрга ўзгариш бўлмайди, деган эди. Лекин оиламиз билан ортга чекинмай, юриш учун қўлдан келганча ҳаракат қиляпмиз. Яқинда Ҳиндистондан келган шифокорларга кўринганимда улар ижобий ўзгариш борлиги, хорижий давлатларда реабилитация қилинса ундан ҳам яхши натижа бўлишини айтиб, бизга умид бағишлади», — дейди Дилдора опа.
Ҳиндистондаги жарроҳлик амалиёти учун 5000 доллар талаб қилинади.
«Операциядан сўнг соғлом одамдай юролмайман. Ходулкада юришим, ҳожатга ўзим мустақил чиқишим мумкин экан. Мен шунисига ҳам розиман. Чунки оёқда юрган одам юролмай қолса, жудаям алам қиларкан. Менинг касалимда қанча кўп юрмаса, шунча юриш деган фикр миядан учаркан. Болаларим бахтига, оилам бахтига ўрнимдан турсам, дейман», — дея сўзларини давом эттиради Дилдора опа.
Азиз юртдошлар, Дилдора Хасановага қўлдан келгунича ёрдам берайлик! Бир муштипар аёлнинг оёққа туриб кетишига сабабчи бўлайлик!
Хайрия қилиш учун:
Дилдора Хасанованинг телефон рақами: 90 710 32 13
Пластик карта рақами: 8600 0609 8874 2566
Visa картаси рақами: 4231 2000 0067 8093 КҲASANОВА ДИЛДОРА
Изоҳ (0)