To‘xtab turish qoidalarini buzgan haydovchilarga onlayn choralar ko‘rilishi bo‘yicha dasturiy ta’minot “Chorsu” bozori atrofida sinovdan o‘tkaziladi

To‘xtab turish qoidalarini buzgan haydovchilarga nisbatan onlayn choralar ko‘rilishi haqidagi dasturiy ta’minot sinov tariqasida “Chorsu” savdo majmuasi atrofida yo‘lga qo‘yiladi. Bu haqda Toshkent shahar IIBBda bo‘lib o‘tgan brifingda ma’lum qilindi.

Unda aytilishicha, onlayn choralar birinchi galda avtoulovlar gavjum bo‘lgan bozor atroflarini qamrab oladi. Keyinchalik esa, ushbu sinovni avtobus bekatlarida ham qo‘llash ko‘zda tutilgan.

Ma’lumki, “Chorsu” savdo majmuasi qadimiy va gavjum bozorlardan sanaladi. Ming afsuski, bozor atrofida avtomobillar turar joyi yetarli emas. Sinov ishga tushgandan so‘ng, Toshkent shahar hokimligiga bu masalani yechish bo‘yicha fuqarolardan ko‘plab murojaatlar tushishi tayin.