Qozog‘istonlik bloger O‘zbekiston militsiyasi haqida maqtovli post yozdi

Qozog‘istonlik bloger Alisher Yelikbayev Facebook‘dagi sahifasida O‘zbekiston militsiyasi haqida maqtovli post qoldirdi.

“Olmaota va Ostonada politsiya poytaxtning nomi o‘zgartirilishidan norozi bo‘lganlarni ayovsiz qo‘lga olayotgan bir paytda, buxorolik militsiya xodimi Rustam bizga Minorai Kalon tarixi, qurilishi haqida so‘zlab berdi, mashhur Buxoro palovini qayerda tanovul qilish, kechki payt qayerlarga borish mumkinligini aytdi. Aslida bizni turmush o‘rtog‘imiz bilan suratga tushirib qo‘yishni taklif qilganimdan so‘ng u bilan tanishib qoldik. Ha, men sizga yangi O‘zbekiston haqida gapirib berayapman”, — deb yozgan qozog‘istonlik taniqli bloger.

Malik Karimovning qayd etishicha, Alisher Yelikbayev piar bo‘yicha ekspert, Qozog‘istonning eng taniqli blogerlaridan va jamoatchilik fikriga ta’sir ko‘rsatadigan vakillaridan biri bo‘lib, shu kunlarda Navro‘z bahona O‘zbekistonda sayohat qilmoqda. @davletovuz’ning ta’kidlashicha, qozoq blogerining Buxoroda bo‘lib, O‘zbekiston ichki ishlar organlari xodimlarining yangi qiyofasi haqida shunday post qoldirishi O‘zbekiston turizmi uchun eng yaxshi piardir.