Bu yilgi Navro‘z bayrami Toshkent viloyatining Chinoz tumani, “Yaxshi niyat” mahallasi aholisi yodida uzoq vaqt qoladigan bo‘ldi. Qishloqda tug‘ilib, kamolga yetgan ikki karra Mehnat Qahramoni Tursunoy Oxunova sharafiga barpo qilingan xotira maydoni davlat rahbari topshirig‘iga binoan obodonlashtirilib, ma’naviyat maskaniga aylantirildi. Bu haqda “Daryo”ga “Xalq bilan muloqot” guruhi ma’lum qildi.
Tursunoy Oxunova byusti restavratsiya qilinib, xotira maydoni qayta qurildi, qarovsiz qolib ketgan muzey tiklanib, madaniyat markaziga aylantirildi. Shu munosabat bilan “Yaxshi niyat” mahallasidagi mazkur maskanda o‘tgan tadbirda uch avlod vakillari bir nuqtada jam bo‘ldi.
Tadbirda Tursunoy Oxunova hayoti va faoliyati bilan bog‘liq ibratli xotiralar yodga olindi. Byust poyi gullarga burkandi. Bu hududda shu paytga qadar saylgoh yoki xiyobon bo‘lmagan. Ana shunday xayrli tashabbus natijasida katta hayotga qadam qo‘yayotgan yosh oilalarning unutilmas onlari yanada fayzli o‘tadigan bo‘ldi.
Mazkur majmuaning yana bir ahamiyatli jihati bu yerda hududdagi ta’lim muassasalari o‘quvchilari uchun ochiq darslar o‘tkazish uchun ham imkoniyat va sharoit yaratilgani bilan bog‘liq.
Bu yerdagi muzey oddiy dehqon farzandining hayot yo‘lidan so‘zlaydi. Birinchi o‘zbek mexanizator ayoli Tursunoy Oxunova mashaqqatli mehnati, irodasi, qat’iyati va kamtarligi tufayli el-yurt hurmatini topdi. Buni muzeyga qo‘yilgan suratlardan ham payqash qiyin emas.
Mazkur maskanni keng qamrovli ma’rifat markaziga — yoshlarni kamolga yetkazadigan yirik majmuaga aylantirish rejalashtirilmoqda. Muzey binosida tez kunda musiqa va shaxmat to‘garaklari ish boshlasa, ko‘p o‘tmay atrofdagi yerlar ham obodonlashtirilib, xiyobon, sun’iy futbol maydoni, mo‘jaz kutubxonalar barpo qilinadi.
Izoh (0)