Toshkentdagi konsalting agentligi direktori Saida Yusupova har yili BMT va Jahon banki ko‘magida ayollar o‘rtasida o‘tkaziladigan xalqaro tanlov g‘olibi bo‘ldi, deb xabar berdi UzDaily.
“BMTning barqaror rivojlanish maqsadlari va ayol” xalqaro tanlovi dunyoning turli mamlakatlaridagi tadbirkor ayollarning ijtimoiy-iqtisodiy va ekologik muammolarni hal qilishga qo‘shgan hissasini namoyish etish maqsadida o‘tkaziladi.
Tanlovda yillik tovar aylanmasi eng kamida 100 000 dollarni tashkil etuvchi mikrotashkilotlarni boshqaruvchi ayollar ishtirok etadi.
2019-yilda tanlovda ishtirok etish uchun butun dunyodagi tadbirkor ayollardan 1200 ta ariza qabul qilindi.
Nufuzli hakamlar hay’ati a’zolari arizalarni ko‘rib chiqib tanlov g‘olibligiga Green Business Innovation konsalting kompaniyasi direktori o‘zbekistonlik Saida Yusupova va TaxShe startap-loyihasi boshlig‘i hindistonlik Vandana Surini munosib deb topdi.
Saida va Vandana 11-aprel kuni Vashington shahrida bo‘lib o‘tadigan taqdirlash marosimida o‘z tashkilotlari faoliyati va biznes-loyihalari natijalari haqida so‘zlab beradi.
Izoh (0)