Toshkent shahri Shayxontohur va Sergeli tumanlari to‘rtinchi sektor rahbarlari tashabbusi bilan “Obod mahalla” dasturi doirasida tubdan rekonstruksiya qilingan maktabgacha ta’lim maskanlari foydalanishga topshirildi. Bu haqda Toshkent shahar DSB matbuot xizmati “Daryo”ga xabar berdi.
Muassasalarning ochilish marosimida Toshkent shahar davlat soliq boshqarmasi, Sergeli va Shayxontohur tumani hokimligi mas’ullari so‘zga chiqib, har bir millat istiqboli shu yurtda kamol topayotgan yosh avlod tarbiyasi bilan chambarchas bog‘liq ekanligi, mamlakatda farzandlarning jismonan sog‘lom va ma’nan yetuk insonlar bo‘lib ulg‘ayishi uchun barcha shart-sharoitlar yaratilayotganini alohida ta’kidlagan.
Tadbirda bolalarga kitoblar jamlanmasi sovg‘a qilinishi, ularga katta quvonch baxsh etgan. Shuningdek, bog‘cha tarbiyalanuvchilari tomonidan musiqiy chiqishlar ko‘rsatilgan.
Shayxontohur tumanida foydalanishga topshirilgan 241-sonli maktabgacha ta’lim muassasasi 1960-yilda qurilgan bo‘lib, shu kunga qadar mukammal ta’mirdan chiqarilmagan edi. Endilikda, bolalarning zamonaviy ta’lim-tarbiya olishi uchun barcha zarur shart-sharoit yaratilgan mazkur bog‘cha 150 nafar o‘g‘il-qizni qabul qiladi.
Turli ertak qahramonlari aks etgan bolalar maydonchasi, oshxona, yuvinish xonasi, tibbiy punkt, yumshoq mebellar jamlanmasi, yozgi basseyn hamda zamonaviy o‘yin maydonchalari tarbiyalanuvchilar xizmatida. Ular uchun kundalik mashg‘ulotlardan tashqari, rus, ingliz tili, rasm chizish, raqs to‘garaklari ham tashkil etilgan.
“Qizim Solihaxon shu bog‘chaga qatnaydi. Bu yerdagi sharoitlarni ko‘rib, quvonch hissini tuydim. Bolalarning o‘yin maydonchalari, ovqatlanish, yuvinish, dam olish xonalari talablarimizga mos”, – deydi ota-onalardan biri Nargiza Doniyorova.
Sergeli tumanidagi 564-sonli maktabgacha ta’lim muassasasi kapital ta’mirdan chiqarilib foydalanishga topshirilgani “Xalqobod” mahalla fuqarolar yig‘ini aholisini behad quvontirgan.
Mazkur 110 o‘ringa mo‘ljallangan muassasada yaratilgan o‘yin maydonchalari, musiqa va sport zallari zarur qo‘llanma hamda ko‘rgazmali vositalar bilan ta’minlangan.
Izoh (0)