Тошкент шаҳри Шайхонтоҳур ва Сергели туманлари тўртинчи сектор раҳбарлари ташаббуси билан «Обод маҳалла» дастури доирасида тубдан реконструкция қилинган мактабгача таълим масканлари фойдаланишга топширилди. Бу ҳақда Тошкент шаҳар ДСБ матбуот хизмати «Дарё»га хабар берди.
Муассасаларнинг очилиш маросимида Тошкент шаҳар давлат солиқ бошқармаси, Сергели ва Шайхонтоҳур тумани ҳокимлиги масъуллари сўзга чиқиб, ҳар бир миллат истиқболи шу юртда камол топаётган ёш авлод тарбияси билан чамбарчас боғлиқ эканлиги, мамлакатда фарзандларнинг жисмонан соғлом ва маънан етук инсонлар бўлиб улғайиши учун барча шарт-шароитлар яратилаётганини алоҳида таъкидлаган.
Тадбирда болаларга китоблар жамланмаси совға қилиниши, уларга катта қувонч бахш этган. Шунингдек, боғча тарбияланувчилари томонидан мусиқий чиқишлар кўрсатилган.
Шайхонтоҳур туманида фойдаланишга топширилган 241-сонли мактабгача таълим муассасаси 1960 йилда қурилган бўлиб, шу кунга қадар мукаммал таъмирдан чиқарилмаган эди. Эндиликда, болаларнинг замонавий таълим-тарбия олиши учун барча зарур шарт-шароит яратилган мазкур боғча 150 нафар ўғил-қизни қабул қилади.
Турли эртак қаҳрамонлари акс этган болалар майдончаси, ошхона, ювиниш хонаси, тиббий пункт, юмшоқ мебеллар жамланмаси, ёзги бассейн ҳамда замонавий ўйин майдончалари тарбияланувчилар хизматида. Улар учун кундалик машғулотлардан ташқари, рус, инглиз тили, расм чизиш, рақс тўгараклари ҳам ташкил этилган.
«Қизим Солиҳахон шу боғчага қатнайди. Бу ердаги шароитларни кўриб, қувонч ҳиссини туйдим. Болаларнинг ўйин майдончалари, овқатланиш, ювиниш, дам олиш хоналари талабларимизга мос», – дейди ота-оналардан бири Наргиза Дониёрова.
Сергели туманидаги 564-сонли мактабгача таълим муассасаси капитал таъмирдан чиқарилиб фойдаланишга топширилгани «Халқобод» маҳалла фуқаролар йиғини аҳолисини беҳад қувонтирган.
Мазкур 110 ўринга мўлжалланган муассасада яратилган ўйин майдончалари, мусиқа ва спорт заллари зарур қўлланма ҳамда кўргазмали воситалар билан таъминланган.
Изоҳ (0)