O‘zbekistonda oxirgi o‘n yillardan buyon ishlatilmay kelayotgan Tolimarjon gaz konidagi quduqlar qayta tiklanishi natijasida mahsulot qatlami ochildi va yuqori bosimdagi dastlabki “zangori olov” chiqa boshladi. Bu haqda “Xalq so‘zi” xabar berdi.
Ushbu loyiha AQShning Epsilon Development LLC kompaniyasi tomonidan amalga oshirilmoqda. Kompaniya davlat xususiy sherikchilik asosidagi kelishuvga ko‘ra Kultog‘-Qamashi, Muborak, Surxon, Ashibuloq, Ko‘shquduq va G‘arbiy-Farg‘ona investitsiya bloklarida geologiya qidiruv ishlari olib boradi. Ushbu bloklarga yo‘naltiriladigan umumiy investitsiya hajmi 5,2 milliard dollarni tashkil qiladi.
Kultog‘-Qamashi investitsiya blokiga kiradigan Tolimarjon koni quduqlarining dastlabkisidan olinayotgan gaz hajmi bir kecha kunduzda 250 ming kubometrni tashkil etmoqda. Ushbu natijaga quduqlarning qayta tozalanib, ishga tushirilishi evaziga erishildi. Mutaxassislarning ta’kidlashicha, mahsulot qatlamiga qayta ishlov berish (tozalash) hisobiga keyingi quduqlar mahsuldorligini bir kecha kunduzda 350 ming kubometrga yetkazish mumkin.
— Tolimarjon konidagi ikkita quduqdan ochilgan tabiiy gazni Sho‘rtan gazni qayta ishlash korxonalariga uzatish uchun tayyorgarlik ko‘rilmoqda, — deydi kompaniya bosh geologi O‘lmaskamol Abdaliyev. — Kondan quvurlar tortilib, gaz qayta ishlash korxonalariga yuboriladi va tozalangan gaz birinchi navbatda aholi hamda ishlab chiqarish korxonalari ehtiyojlari uchun ichki bozorga yetkazib beriladi.
Mazkur investitsiya blokida aniqlangan gaz zaxirasi 69,3 milliard kubometrni tashkil etadi.
Izoh (0)