O‘zA O‘zbekistondagi vazirlik, tashkilot va qo‘mitalarning matbuot xizmatlari reytingini tuzmoqda.
Hozircha unda quyidagi uchlik yetakchilik qilmoqda:
Bandlik va mehnat munosabatlari vazirligi;
Prezident matbuot xizmati;
Oliy va o‘rta maxsus ta’lim vazirligi.
Oxirgi vaqtlarda qaysidir organ xodimlari almashgani yoki qamalgani haqidagi xabarlar birinchi bo‘lib O‘zbekistonda ro‘yxatdan o‘tmagan nashrlarda paydo bo‘lmoqda. Keyinchalik esa bu xabarlarning qanchalik rost yoki yolg‘onligiga tashkilotlar (prokuratura) izoh berish bilan cheklanmoqda.
Ommaga noto‘g‘ri ma’lumot yetib borib, yetarli xulosalar shakllanib bo‘lgach, matbuot xizmatlarining raddiyasi samara berarmikan? Yana buning ustiga, raddiya bergan ma’lumotlarini vaqt o‘tishi bilan tasdiqlashlarining ham guvohi bo‘lyapmiz.
“Ozodlik” manbalari orqali butun xalq “falonchi qamaldi”, degan xabarni eshitib bo‘lgach, tashkilotning rasmiy ma’lumoti qanchalik ahamiyatli yoki ishonarli bo‘ladi?
Bosh prokuratura matbuot xizmati rasmiy ma’lumotlaridan avval “Eltuz”, “Ozodlik” saytlarida mazkur organ faoliyatiga oid shov-shuvli xabarlarning guvohi bo‘lmoqdamiz.
BBC o‘zbek xizmati vakillaridan O‘zbekistondagi vazirlik va tashkilotlar matbuot xizmati faoliyatini baholashni so‘raganimizda, xorijdagi hamkasblar birgina Bosh prokuratura ularning savollarini ochiq qoldirmasliklarini e’tirof etdi. Mahalliy nashrlar esa bu tashkilotni ma’lumotni vaqtida tasdiqlamasliklaridan noliydi.
Ko‘pgina xususiy saytlarda rasmiy matbuot xizmatlari ma’lumotidan avval ishonchli manbalarga tayangan xabarlar yetakchilik qilmoqda. Ya’ni matbuot xizmatlaridan ko‘ra, saytlarning o‘z ishonchli manbalari faolroq ko‘rinmoqda.
Media vositasiga aylanib ulgurgan barcha ijtimoiy tarmoqlarda bugun deyarli hamma vazirlik va tashkilotlarning o‘z sahifalari bor.
Adliya vazirligi matbuot xizmati ham ijtimoiy tarmoqlarda faol va doim jurnalistlarning murojaatini javobsiz qoldirmaydi.
Innovatsiya vazirligi, O‘zbekiston xotin-qizlar qo‘mitasi matbuot xizmati haqida ham ko‘pgina hamkasblar yaxshi fikrda.
O‘zbekiston musulmonlari idorasi ham jamiyatda yoki xorijda ro‘y bergan voqealarni befarq kuzatmasdan ularga o‘z munosabatini bildirmoqda.
Iste’molchilar huquqini himoya qilish jamiyatlari federatsiyasi jamoat tashkilotining matbuot xizmatining ham matbuotdagi chiqishlarini ko‘pgina hamkasblar yaxshi baholaydi. Federatsiya noreal qarzdorliklar bo‘yicha olib borayotgan ishlarini faol yoritib bormoqda.
Izoh (0)