Namanganda aka-uka Ahmadxonovlar valyuta qimmatliklarini noquniy ravishda Qirg‘istonga olib chiqib, konvertatsiya qilmoqchi bo‘ldi. Ammo ularning bu urinishlari amalga oshmadi. Bu haqda “Daryo”ga jinoyat ishlari bo‘yicha Uychi tuman sudi raisi Jamshid Ma’murov ma’lum qildi.
2018-yilning sentabr oyida aka-uka Ahmadxonovlar tanishlari B.Jo‘rayev, O.Mahmudov hamda boshqa shaxslar bilan til biriktirib, bojxona nazoratini chetlab, valyuta qimmatliklarini O‘zbekiston bojxona chegarasidan Qirg‘izistonga o‘tkazib, rasmiy qidiruvda bo‘lgan boshqa shaxsning Dubay va Turkiyadagi bank hisob raqamiga konvertatsiya qilish haqida o‘zaro kelishadi.
O‘tgan yil sentabr oyidan 2018-yil 23-oktabrga qadar B.Jo‘rayev tomonidan Toshkent shahridagi xonadonda yig‘ilgan 733.088 AQSh dollarini A.Ahmadxonov o‘zining boshqaruvidagi avtomashinaga yuklab, Namangan viloyatining Chust tumaniga olib keladi. U valyuta qimmatliklarini Qirg‘izistonga o‘tkazishi va O.Mahmudovga yetkazishi kerak edi.
Biroq ularning bu rejasi amalga oshmadi. Olib borilgan tezkor tadbir natijasida Chust tumani, Karkidon qishlog‘i hududida DXX Namangan viloyat boshqarmasi xodimlari tomonidan avtomashina to‘xtatiladi. Xolislar ishtirokida mashina yukxonasi zaxira balloni o‘rniga joylashtirilgan 3 dona qora rangli polietilen paketlarga solinib, skoch bilan o‘ralgan 6.030.389.388 so‘mga teng 733.088 AQSh dollari, A.Ahmadxonov va O.Mahmudovdan 18.508.725 so‘mga teng 2250 AQSh dollari hujjatlashtirib olinadi.
Shundan so‘ng A.Ahmadxonov, B.Jo‘rayev, O.Mahmudov va B.Ahmadxonov Jinoyat kodeksining tegishli moddalari bilan javobgarlikka tortiladi.
Jinoyat ishlari bo‘yicha Uychi tuman sudida ushbu jinoyat ishi ko‘rib chiqilib, sudlanuvchilarga nisbatan 5 yil va 5 yilu 1 oy ozodlikdan mahrum etish jazosi tayinlandi.
733.088 AQSh dollari va 2250 AQSh dollari hamda valyuta qimmatliklari tashilgan Nexia rusumli mashina davlat daromadi hisobiga o‘tkazildi.
Izoh (0)