O‘zbekiston davlat san’at va madaniyat instituti tashabbusi bilan bundan bir yil avval Mo‘ynoq tumani Shag‘irli ovulida bunyod etilgan “Qo‘qon bog‘i”ga ekilgan daraxtlar kurtak yoza boshladi. Bu haqda O‘zA xabar berdi.
Hozirgi kunda ushbu joyda ekilgan mevali va manzarali daraxtlarning asosiy qismi, yerga moslashib tutib ketdi.
Mo‘ynoq tumanidagi ekologik muammoni bartaraf etishda o‘z ulushini qo‘shish maqsadida O‘zbekiston davlat san’at va madaniyat instituti rahbariyati tashabbusi bilan o‘tgan yili “Qo‘qon bog‘i” tashkil etilgan edi. Muassasaning Farg‘ona va Nukus filiallari ishtirokida bog‘ni barpo etishda mevali daraxtlar va Kaliforniya daraxti qalamchalari olib kelinib ekilgan.
Ushbu xayrli ishning mantiqiy davomi sifatida o‘rmon xo‘jaligi tasarrufidagi 2 gektar maydonda O‘zbekiston Milliy universitetining o‘quv-ilmiy maydonchasi tashkil etilib, ushbu universitetning talaba-yoshlari bog‘ barpo qilmoqda. Mazkur ishda Nukus davlat pedagogika instituti hamda Qoraqalpoq davlat universiteti talabalari ham hamkorlik qilmoqda.
“Orol va yoshlar” shiori ostida tashabbuskor talaba-yoshlar o‘quv-ilmiy ekspeditsiyasi a’zolari tomonidan tashkil qilingan ushbu tadbirning dastlabki kunida hudud to‘liq ko‘chatlar ekish uchun tayyorlandi.
Ekspeditsiya axborot xizmati ma’lumotiga ko‘ra, hozirda bog‘ yaratish ishlari boshlanib, hududni simmetrik o‘lchash, jo‘yak olish, chuqurchalar qazish, tuproq geomorfologiyasini tadqiq qilish kabi ishlar bajarildi. Archa va tok ko‘chatlari ekildi. Umuman, yangi bog‘ga 12 turdagi mevali, manzarali o‘simliklar ekilishi reja qilingan.
Talabalarning ilmiy-tadqiqot ishlari predmeti aynan Orol muammosi, Orolbo‘yi tuprog‘i, o‘simliklari, suvlari, ularning tarkibi hamda xususiyatlarini tadqiq etishdir.
Ekspeditsiya a’zolari hududda ilmiy-tadqiqot ishlarini olib borib, Orolbo‘yi tuproqlari, o‘simliklari, suvlari va ularning tarkibi hamda xususiyatlarini o‘rganadi.
Izoh (0)