ЎзА Ўзбекистондаги вазирлик, ташкилот ва қўмиталарнинг матбуот хизматлари рейтингини тузмоқда.
Ҳозирча унда қуйидаги учлик етакчилик қилмоқда:
Бандлик ва меҳнат муносабатлари вазирлиги;
Президент матбуот хизмати;
Олий ва ўрта махсус таълим вазирлиги.
Охирги вақтларда қайсидир орган ходимлари алмашгани ёки қамалгани ҳақидаги хабарлар биринчи бўлиб Ўзбекистонда рўйхатдан ўтмаган нашрларда пайдо бўлмоқда. Кейинчалик эса бу хабарларнинг қанчалик рост ёки ёлғонлигига ташкилотлар (прокуратура) изоҳ бериш билан чекланмоқда.
Оммага нотўғри маълумот етиб бориб, етарли хулосалар шаклланиб бўлгач, матбуот хизматларининг раддияси самара берармикан? Яна бунинг устига, раддия берган маълумотларини вақт ўтиши билан тасдиқлашларининг ҳам гувоҳи бўляпмиз.
«Озодлик» манбалари орқали бутун халқ «фалончи қамалди», деган хабарни эшитиб бўлгач, ташкилотнинг расмий маълумоти қанчалик аҳамиятли ёки ишонарли бўлади?
Бош прокуратура матбуот хизмати расмий маълумотларидан аввал «Элтуз», «Озодлик» сайтларида мазкур орган фаолиятига оид шов-шувли хабарларнинг гувоҳи бўлмоқдамиз.
BBC ўзбек хизмати вакилларидан Ўзбекистондаги вазирлик ва ташкилотлар матбуот хизмати фаолиятини баҳолашни сўраганимизда, хориждаги ҳамкасблар биргина Бош прокуратура уларнинг саволларини очиқ қолдирмасликларини эътироф этди. Маҳаллий нашрлар эса бу ташкилотни маълумотни вақтида тасдиқламасликларидан нолийди.
Кўпгина хусусий сайтларда расмий матбуот хизматлари маълумотидан аввал ишончли манбаларга таянган хабарлар етакчилик қилмоқда. Яъни матбуот хизматларидан кўра, сайтларнинг ўз ишончли манбалари фаолроқ кўринмоқда.
Медиа воситасига айланиб улгурган барча ижтимоий тармоқларда бугун деярли ҳамма вазирлик ва ташкилотларнинг ўз саҳифалари бор.
Адлия вазирлиги матбуот хизмати ҳам ижтимоий тармоқларда фаол ва доим журналистларнинг мурожаатини жавобсиз қолдирмайди.
Инновация вазирлиги, Ўзбекистон хотин-қизлар қўмитаси матбуот хизмати ҳақида ҳам кўпгина ҳамкасблар яхши фикрда.
Ўзбекистон мусулмонлари идораси ҳам жамиятда ёки хорижда рўй берган воқеаларни бефарқ кузатмасдан уларга ўз муносабатини билдирмоқда.
Истеъмолчилар ҳуқуқини ҳимоя қилиш жамиятлари федерацияси жамоат ташкилотининг матбуот хизматининг ҳам матбуотдаги чиқишларини кўпгина ҳамкасблар яхши баҳолайди. Федерация нореал қарздорликлар бўйича олиб бораётган ишларини фаол ёритиб бормоқда.
Изоҳ (0)