Ijtimoiy tarmoqlardagi trendlar: Yangi Zelandiyadagi dahshat. Ichki ishlar xodimlarining yangi formasi. Kitob o‘qish bo‘yicha rekord qo‘ya olamizmi?
O‘tgan hafta ijtimoiy tarmoqning o‘zbek segmentida ko‘p muhokama qilingan mavzular va eng yaxshi post, izohlar bilan navbatdagi dayjestimizda tanishtirishni boshlaymiz.
Ijtimoiy tarmoqda nafaqat o‘zbekistonliklar, balki butun dunyoni titratgan voqea bu Yangi Zelandiyada juma kuni sodir etilgan dahshatli terrorchilik harakati bo‘ldi. Bir necha terrorchi juma kuni ikki masjidga qurollangan holda kirib, u yerga ibodat uchun kelgan namozxonlarni shafqatsizlarcha otib ketishi natijasida 50 nafarga yaqin inson halok bo‘ldi. Bu voqealarga butun dunyo o‘z munosabatini bildirdi. Terror nomiga la’natlar o‘qildi. Insonlar dinidan va irqidan qat’iy nazar terrorizmni qoralab, musulmon birodarlarga o‘z hamdardliklarini bildirib, ular bilan birga ekanligini aytdi. Quyida ushbu voqealarga doir munosabatlardan havolalar keltiramiz.
Eng: This was left on the entrance of Husby mosque today. Beautiful act from our Christian friends.
O‘zb: Oldimizdagi Masgid Husby masjidi oldiga gul qoldirib ketishibdi ushbu xat bilan. Odam sevindi buni ko‘rib:
“Musulmon aka-opalarga: Yangi Zelandiyadagi terror amaliyotidan qattiq qayg‘udamiz. O‘zaro farqlarimizni qabul qilgan holda bu dunyoda birlikda yashashimiz nasib qilsin.
Gollandiyada yashaydigan Yangi zelandiyalik bu bola kecha juma namoziga gul ko‘tarib kelib, ko‘zida yosh bilan musulmonlardan uzr so‘rabdi. Videoni quyidagi havolada ko‘rishingiz mumkin.
Har qanday terror hujumidan maqsad odamlarda qo‘rquv uyg‘otish va bu qo‘rquvning uzoqroq va ta’sirliroq bo‘lishiga erishishdir. Yangi Zelandiyadagi terror hujumini videoga olib, tarqatishdan maqsad ham shu. O‘sha videoni ko‘chirvolib tarqatib, turli guruhlarga tashlayotganlar o‘sha terrorchining maqsadiga xizmat qilishyapti. Boshni ishlatinglar, bunchalik laqma bo‘lish kerakmas.
Tasodifan biror yerda ko‘rsangiz mayli, yana uni tarqatib rohat olasizlarmi?
15-mart kuni mudhish voqeadan keyin avstraliyalik islomofob, senator Freyzer Enning “musulmonlar o‘lgani bilan ularning ayblari kamayib qolmaydi, odatda ular jinoyatchi bo‘ladi”, degan edi. Bugun ushbu gaplariga izoh berayotgan paytda bir o‘smir bola uning boshini tuxum bilan “chaqib” qo‘ydi.
Osmon qarab turdi, yer chidab turdi,Vahshiylik to‘niga burkandi lain.Og‘ir bir sukunat suqilib kirdi,Zotan o‘lim haqu, oqibat tayin...
Dilni moziy quchgan xun o‘ti yedi,Butun bashariyat tutindi guvoh —Bu gul qismatlarning hayoti edi,Kompyuter o‘yini emasdi, evoh.
Bilaman, milliard g‘ichirlar tishlar,Qo‘llar bug‘moq istar ul sharafsizni:Allohning uyida bo‘ldi bu ishlar,Allohning uyida, eshityapsizmi?!
Ochildi jamiki oriy pardalar,Olam o‘z iqrorin sochdi oxiri:Qiyomat jumada kelar, derdilar,Bugun sodir bo‘ldi kichik zohiri.
Yig‘ladim onamni yo‘qotgan kabi,Singlimdan ayrilgan akadek, do‘stlar.Allohning yoniga ketdi talabiAllohning O‘zini tanigan ko‘zlar.
Birgina, birgina yupanchim shulki –Bari o‘ch, bari xun yotur g‘alvirda:Hali hammasini qiyomat tongiKo‘ramiz Maydonda, jonli efirda!
* * *
O‘zbekiston musulmonlari idorasi raisi, muftiy Usmonxon Alimov 15-mart kuni Yangi Zelandiyaning Kraystchyorch shahridagi ikkita masjidga millatchi, terrorchilarning bostirib kirib, namozxonlarni o‘qqa tutishi oqibatida yuz bergan fojia qurbonlari haqqiga Qur’on tilovati qilishni tavsiya qildi.
Foto: Facebook
Terrorning millati yo‘q, dini yo‘q, u barcha davrda, barcha xalq va din kishilari tomonidan la’natlanadi. Ushbu jirkanch terroristik hujum dunyoni yana bir bor terrorizmga qarshi birlashtirganiga guvoh bo‘ldik, ilohim dunyoda tinchlik bo‘lsin, bitsin terrorizm!
Ichki ishlar xodimlari yangi kiyim oldi
Ichki ishlar xodimlarining yangi formalari jamoatchilikka taqdim etildi. Ijtimoiy tarmoqda yangi forma haqida turli qarashdagi postlar yozildi.
Endi Germaniyadan turist kelsa o‘z uyidek his qiladi, lekin Isroildan kelsa g‘alati bo‘lishadi. Aytdim qo‘ydimda...
Siz ham rekord kitobiga kirishingiz mumkin!
Respublika yosh ijodkorlar kengashi O‘zbekistonni ovqat borasida emas, kitobxonlik borasida Ginnesning rekordlar kitobiga kiritish niyatida loyiha boshlabdi. Bu haqda kengashning Telegram-kanali xabar qildi.
“Mening kitobxon yurtim” megaloyihasi o‘z qahramonlarini chorlaydi!
Dunyoni kitobing bilan zabt et, O‘zbekiston! “O‘tkan kunlar”ing bilan yorug‘ kelajakka yuzlan!
10-aprel soat 17:00 da poytaxtimizning “Paxtakor” stadioniga jam bo‘lib, olamshumul voqeaga o‘zing guvoh bo‘l!
Ginnesning rekordlar kitobiga O‘zbekiston nomi muhrlanadigan kun minglab o‘zbekning bir safda bo‘lishidan mag‘rurmiz!
10-aprel — Abdulla Qodiriy tavallud topgan kuni Toshkentda yangi dunyo rekordi o‘rnatilishi mumkin!
Shu kuni Abdulla Qodiriyning “O‘tkan kunlar” romani o‘qiladi va eng ko‘p tinglovchi auditoriyasini yig‘ish bo‘yicha dunyo rekordi yangilanadi. Avvalgi rekord 2018-yil 3-mart kuni Hindistonda o‘rnatilgan. Maxarashtra shtatidagi rekordda 6 ming 786 nafar kitobxon ishtirok etgan.
Rekord ishtirokchisi bo‘ling va kitob o‘qish, uni tinglashni targ‘ib qiling!
O‘zbekiston turizmi yana Yevropa futbolida reklama qilindi
O‘zbekiston brendi Ispaniya futbol maydonlarida paydo bo‘ldi!
* * *
“Xalq bilan muloqot” guruhiga qo’yilgan post biroz kinoyali bo’lsa ham, undagi maqsad ko‘pchilikka yetib borishi uchun dayjestimizda keltirishga qaror qildik. Yigitlar, haqiqatan ham, yaxshi emas qizlarga joy bermasdan bezrayib o’tirib olish!
Bilamizki, metroning “Amir Temur xiyoboni” va “Paxtakor” bekatlarida vagondagi opa yosh bolali, nogiron va yoshi katta yo‘lovchilargalarga joy berishni taklif etadi. Iltimos, shu joyga “O‘g‘il bolalar, jentlmen bo‘lib, qizlarga ham joy beringlar” deb qo‘shib qo‘ysin. Rahmat!
Telegram’da nima gaplar?
Bloger Nozim Safariy o‘zining Safariy kanalida yaxshi post yozibdi.
“Xira moviy nuqta”
1990-yil 14-fevral kuni Yerdan 6 milliard kilometr masofada Voyager 1 kosmik kemasidan olingan Yer sayyorasining fotosurati.
Foto: Telegram
Suratdagi mana bu nuqtaga e’tibor bilan qarang. Xuddi shu yer, shu yer bizning uyimiz! Mana shu — biz! Yaqin kishingiz, siz tanigan-bilgan, ko‘rgan-eshitgan — hammasi shu yerdan makon topgan. Mutaassib dindorlar, minglab mafkurayu iqtisodiy ta’limotlar, insoniyat tarixida o‘tgan har bir termachi-yu ovchi, qahramon-u qo‘rqoq, tamaddunlar bunyodkori-yu vayronkori, olam sarvari atalmish podshoh-u oddiy bir dehqon, oshiq-u ma’shuq, ota-ona-yu ularga umid to‘la ko‘zlarini tikkan farzand, mashhur ixtirochi-yu izlanuvchi, axloq peshvosi-yu nobop siyosatchi, “super yulduz”u “oliy rahnamo” — barcha-barchasi shu yerda — Quyosh shu’lasida suzib yurgan girdibodda umr kechiradi.
Zamin — ulkan koinot bag‘ridagi mitti sahna. Shon-shavkat va g‘alaba ilinjida daryo-daryo qon to‘kkan general-u imperatorlarni eslang. Ular ana shu girdibodning birgina zarrasiga oniy fursat egalik qila olgan, xolos. Ayni shu “nuqta”ning bir puchmog‘ida umr kechiruvchi insonlar uning boshqa tomonida yashovchi o‘zlaridan deyarli farq qilmaydigan turdoshlariga mislsiz zo‘ravonliklar qilgani, ular o‘rtasida tushunmovchilik naqadar odatiy hol ekanini, bir-birining qoniga qanchalar tashna bo‘lganiyu bir-biriga nafrati ko‘kka o‘rlaganini bir mulohaza qilib ko‘ring. Ana shu miltirab turgan shu’la bu dunyodagi munofiqligu manmanliklarimiz, koinotdagi eng nufuzli mavqe bizga tegishli degan soxta tasavvurlarimiz asosini larzaga keltirsa ne ajab…
O‘tgan haftaning so‘ngidagi asosiy mavzularni siz azizlarga yetkazishga harakat qildik, lekin biz qo‘yib ulgurmagan minglab postlar qolgani haqiqat. Ular bilan navbatdagi dayjestlarimizda tanishtirishda davom etamiz, siz esa bizni kuzatishda davom eting.
Izoh (0)